Iriston.com
www.iriston.com
Цæйут æфсымæртау раттæм нæ къухтæ, абон кæрæдзимæ, Иры лæппутæ!
Iriston.com - история и культура Осетии
Кто не помнит прошлого, у того нет будущего.
Написать Админу Писать админу
 
Разделы

Хроника военных действий в Южной Осетии и аналитические материалы

Публикации по истории Осетии и осетин

Перечень осетинских фамилий, некоторые сведения о них

Перечень населенных пунктов Осетии, краткая информация о них и фамилиях, в них проживавших

Сборник материалов по традициям и обычаям осетин

Наиболее полное на сегодняшний день собрание рецептов осетинской кухни

В данном разделе размещаются книги на разные темы

Коста Хетагуров "Осетинскя лира", по книге, изданной во Владикавказе (Орджоникидзе) в 1974 году.


Перечень дружественных сайтов и сайтов, схожих по тематике.



Rambler's Top100 Рейтинг@Mail.ru Индекс цитирования
Статьи Словари
Здравствуйте, Гость
Регистрация | Вход
Опубл. 29.08.2010 | прочитано 3833 раз |  Комментарии (11)     Автор: Tabol Вернуться на начальную страницу Tabol
Ирон æвзаг райрæзын кæнынæн

Ирон адæмæй хъуыды кæнынхъом чи у, уыдонæй дызæрдыггаг никæмæн у, ирон æвзагæн сæфынæй тас кæй у, уый. Стæй дард фидæны нæ, фæлæ ныры фæлтæры цæстуынгæйæ. Дзæуджыхъæуы скъолаты райдайæн кълæсты ахуыргæнджытæн цы социологион æрфарст уыд, уый бæрæггæнæнтæм гæсгæ, ныридæгæн фыццæгæм кълæсты ахуыргæнинæгтæн сæ 80–90 проценты иронау дзурын нæ зонынц, ирон уæвгæйæ. Уавæр бирæ хуыздæр нæу Беслæны дæр. Иннæ районты центрты иронау æмæ уырыссагау дзурæг сывæллæтты нымæц нырма æмхуызон у, фæлæ хæстæгдæр дæсгай азты тыхджындæр фæуыдзæн уырыссаг æвзаг, æмæ ма ирæттæ иронау дзурдзысты æрмæст бинонты ’хсæн. 

Мах нæ национ æвзаг куы фесафæм, уæд сæфт æрцæудзысты (ныридæгæн дæр сæфынц) нæ культурон традицитæ, ног фæлтæртæ сæ национ культурæйы хæзнатæн зондзысты æрмæст сæ чысыл хай, иннæтæ сын уыдзысты дуарæхгæд, иронау кæй нæ зонынц, уый аххосæй. Æвзаг æмæ культурæ сты адæмы æнгомгæнæг, æнæ уыдон нæ нацийæ рауайдзæн йæ уидæгтæй иртæст адæм, æмæ гыццылгай ныххæлиу уыдзыстæм Уæрæсе æмæ дунейы къуымты. Æвзаг æмæ культурæ куы нæ уой, уæд фæсивæды ницы бæтты райгуырæн зæххимæ, уымæн ацæуынц æнцонæй æндæр горæттæм æмæ бæстæтæм хуыздæр цард агурынмæ, гыццыл экономикон кæнæ социалон фæлварæн куы фæзыны, уæд, æмæ фылдæр хатт фæстæмæ нал æрыздæхынц. Ирыстоны дзы чи баззайы, уыдон та дыууæ культурæйы ’хсæн нындзыг вæййынц: ирæттæ дæр нал вæййынц, уырыссæгтæ кæнæ францæгтæ дæр сæ нæ рауайы. 

Арфдæр ахъуыды кæнгæйæ, не ’взаджы æмæ культурæйы ассимиляци дарддæр афтæ куы цæуа, уæд тас у, ног дуджы бирæ фыдæвзарæнты нæ этникон æнгомдзинад, политикон, экономикон æмæ социалон хæдбардзинад куы фесафæм, уымæй. 

Афон нын у уыцы æцæгдзинад бамбарынæн æмæ бындурон мадзæлттæй архайынæн (цæмæдæр гæсгæ нæм дзырдбаст «бындурон мадзæлттæ» нæ уарзынц), æрмæст афтæмæй фервæзын кæнæн ис не ’взагæн. Уыимæ, дызæрдыггаг нæу: ирон æвзаг бахъахъхъæныны æмæ рæзын кæныны куысты сæйраг бынат хъуамæ бацахса ахуырады къабаз. 

Цавæр хъуамæ уой уæдæ уыцы бæлвырд къахдзæфтæ? 

Райдайын хъæуы сывæллæтты рæвдауæндæттæй. Фыццаджыдæр, рæвдауæндæтты фæхуыздæр кæнын хъæуы ирон æвзаг ахуыр кæныны хæрзхъæддзинад. Дыккаджы, байгом кæнын хъæуы, сывæллæтты иронау кæм ахуыр кæнынц, хъомыладон куыст иууылдæр иронау кæм цæуы, ахæм рæвдауæндæттæ. Уыцы нысанæн Цæгат Ирыстоны паддзахадон педагогон институты ЮНЕСКО-йы кафедрæйы бацæттæ кодтам ахуырты программæтæ æмæ конспекттæ (дыууæ хуызы) æппæт къордтæн дæр, иронау чи æмбары æмæ чи не ’мбары, ахæм сывæллæттæн. Уый нæ, фæлæ ма ахуырты конспекттæ бацæттæ кодтам æппæт предметтæн дæр — математикæйæн, алфамбылай æрдз зонынæн, нываивадæн, музыкæйæн (иронау æмæ дыгуронау). Дзæуджыхъæуы администрацийы æххуысæй 2010-æм азы сентябры горæты сывæллæтты рæвдауæндæттæй фондз кусын райдайдзысты ирон программæтæм гæсгæ. Уымæй уæлдай, Ахуырады рæзты нысанмæарæзт федералон программæ æххæст кæнгæйæ, æмæ нæ республикæйы Ахуырады æмæ наукæйы министрады æххуысæй цалдæр ирон рæвдауæндоны байгом уыдзæн алы районы дæр. Фæлæ уый тынг гыццыл у, денджызы — иу æртах. Уыцы ахуырадон æрмæджытæ æвæстиатæй рауадзын хъæуы мыхуырæй, фылдæр рæвдауæндæтты сæ цæмæй пайда кæной, уый тыххæй. Кæй зæгъын æй хъæуы, раздæр бацæттæ кæнын хъæудзæн хъомылгæнджыты æмæ ирон æвзаджы инструкторты. 

Астæуккаг скьолайы дæр ирон æвзаг ахуыр кæныны куыст рацаразын хъæуы æнæхъæнæй. Уый тыххæй мах сарæзтам ног ахуыргæназн чингуытæ 1-æм къласæй 11-æм къласы онг, иронау чи зоны, уыдонæн дæр, чи нæ зоны, уыдонæн дæр. Уыцы чингуытæ дæр æвæстиатæй сты рауадзинаг, цæмæй сæ скъолатæн радтæм. Уыимæ, ирон æвзаджы сахæттæ къаддæргæнæн нæй. Куыд нæ, уымæн ис бирæ мадзæлттæ. 

Фæлæ ирон æвзаг райрæзын кæныны хъуыддаджы стыр ныфс æвæрæм ног ахуырадон системæ саразынæй — бирæвзагон æмæ бирæкультурон (полилингвалон æмæ поликультурон). Уый фæрцы не скъолаты æмбар, æмсæр уыдзысты ирон, уырыссаг æмæ фæсарæйнаг æвзæгтæ, ирон, уæрæсейаг æмæ дунеон культурæтæ. Полилингвалон ахуырады бындуры æвæрд ис цапдæр æвзаджы зонын, ома, предметты иу хай лæвæрд цæудзæн иронау, дыккаг хай — уырыссагау, æртыккаг — фæсарæйнаг æвзагыл (профильмæ рахизгæйæ). 

Ам зæгъын хъæуы уый, æмæ фæсарæйнаг æвзæгтæ дыккæгæм къласæй ахуыр кæнын кæй райдыдтой, уый сæвзæрын кодта ног зындзинад. Ирыстоны хъæуккаг сывæллæттæ скъоламæ бацæуыны кары уырыссаг æвзаг нæма фæзонынц, афтæмæй сын уырыссаг æвзаджы фæрцы амонын райдайынц фæсарæйнаг æвзаг. Дызæрдыггаг нæу, иронау сын æй куы амониккой, ирон æвзаджы арæзт хынцгæйæ, уæд-иу сывæллæттæ фæсарæйнаг æвзаг æнцондæрæй базониккой. Мах сарæзтам ахæм ахуыргæнæн чингуытæ англисаг æвзагæн 2–4-æм кълæстæн (ирон æмæ дыгурон варианттæ). 

Полилингвалон бындур æххæстгонд у æмбæлгæ мидисæй. Математикæйæ, алфамбылай дуне зонынæй, музыкæйæ, нываивадæй цы ног чингуытæ бацæттæ кодтам, уыдоны мидисы аивæй иу кæнынц, куыд иумæйагадæмон æмæ уæрæсейаг культурологион азмæ сæрмагонд зонындзинæдтæ, афтæ ирон историон æмæ культурон цаутæ дæр. Ахæм мадзал ахадгæдæр у традицион ахуыры мадзалæй (уæрæсейаг æмæ национ-регионалон компоненттæ хицæнæй ахуыр кæныны мадзалæй). Цæмæн хъуамæ ныхмæвæрд цæуой иумæйагадæмон, иумæйагпаддзахадон æмæ национ-культурон? Мах фæлтæрддзинад куыд æвдисы, афтæмæй национ-культурон здæхт, иумæйагуæрæсеон культурон хæзнатæ æмæ иумæйагадæмон идеалтæ иу ахуыргæнæн чиныджы лæвæрд куы уой, Ирыстон базонгæйæ, ирон сывæллон Уæрæсемæ, стæй æппæт дунемæ куы рахизы (хæстæгæй — дардмæ, бæлвырдæй — абстрактонмæ, зонгæйæ — æнæзонгæмæ), уæд хуыздæр базоны æрмæг, æнцондæрæй бамбары, йæ ирон культурæ иумæйагуæрæсеон æмæ дунеон культурæйы иу хай кæй у, йæхæдæг та — уæрæсейаг нацийы æмæ дунеон цивилизацийы хай. 

ЮНЕСКО-йы кафедрæйы кусджытæ ахæм æмбаст ахуыргæнæн чингуытæ сарæзтой æппæт предметтæй дæр: ирон-дыгурон варианттæ æмæ уырыссаг æвзагыл. Чингуытæ бафæлваргæйæ, рабæрæг, цæмæй хуыздæр сты, уый. Фыццаджыдæр, ахуыргæнæн чингуытæ цалдæр æвзагыл уагъд кæй сты, уый скъолайæн фадат дæтты æвзаг равзарынæн, скъоладзаутæ йæ куыд зонынц, уымæ гæсгæ, æмæ афтæмæй ахуыргæнинæгтæ хуыздæр бамбарынц æрмæг. 

Дыккаджы, чингуытæ цы концептуалон бындурыл арæзт сты «Ирыстон — Уæрæсе — дуне», уый фæрцы сывæллæтты дунембарынады рæзт вæййы нывыл, цадæггай бамбарынц, Ирыстоны цæрджытæ кæй сты, Уæрæсейы граждæнтæ æмæ дунеон æхсæнады уæнгтæ, ирон культурæ та уæрæсейаг æмæ иумæйагдунеон культурон тыгъдадæн йæ гармонион хай кæй у. 

Рæвдауæндæтты сывæллæттæн æмæ скъолаты ахуырдзаутæн арæзт чингуытæ цалдæр азы дæргъы фæлвæрд цыдысты, æмæ афтæмæй рабæрæг, нæ мадзæлттæ раст кæй сты, уый, æмæ полилингвалон, поликультурон ахуырад рапарахат кæнын кæй хъæуы Ирыстоны, уыимæ дыууæ варианты: ирон-уырыссаг æмæ уырыссаг-ирон

Ирон-уырыссаг варианты: хъæууон райдайæн скъолаты предметтæ цæудзысты уæлдæр амынд чингуытæм гæсгæ — иронау. 3–4-æм кълæсты сабыргай рахиздзысты дыууæ æвзагыл ахуырмæ, уый фæстæ — уырыссаг æвзагыл ахуырмæ. 5–9-æм кълæсты ма иронау ахуыр кæндзысты æрмæст ахæм предметтæ: «Ирон æвзаг æмæ литературæ», «Ирыстоны географи», «Ирыстоны истори», «Ирон традицион культурæ», «Музыкæ», «Нываивад». Ацы предметтæй иуæй дæр скъоладзаутæ иумæйаг паддзахадон фæлварæн (ЕГЭ) нæ дæтдзысты, фæлæ уыцы-иу рæстæг, предметтæ иронау кæй ахуыр кæндзысты, уый фæрцы, куыд æмбæлы, афтæ базондзысты ирон литературон æвзаг. Æмæ ныфс æвæрæн ис, се ’хсæн кæй фæзындзæн фидæны ирон фысджытæ, поэттæ, драматургтæ, актертæ, зарæггæнджытæ, композитортæ, уыдоны фæрцы та йæ къахыл слæудзæн нæ национ аивад. 

Уырыссаг-ирон варианты: уыцы вариантæй фылдæр пайда кæндзысты горæты скъолаты. Райдайæн кълæсты иумæйагахуырадон предметтæ амонæн ис мах чингуытæм гæсгæ, фæлæ уырыссагау, ирон æвзагæн та сын хъуамæ лæвæрд уа бирæ фылдæр рæстæг. 

Æрмæст ахæм мадзæлттæй раздахæн ис ирон сывæллæтты фылдæр хай мадæлон æвзагмæ, фыдæлты культурæмæ, æппынфæстаг, ирон адæммæ. 

Полилингвалон ахуыры дыууæ варианты дæр фондз азы дæргъы фæлвæрд цыдысты нæ республикæйы скъолаты. Ныртæккæ сæ фæлварынц федералон æмвæзадыл, æмæ 2010 азы сентябры Цæгат Ирыстоны скъолатæй 50 кусын райдайдзысты полилингвалон ахуырадон программæтæм гæсгæ, уыдонæй 30 — ирон æвзагыл. Нæ фæлтæрддзинадæй пайда кæнын райдыдтой Республикæ Татарстаны æмæ Цæцæны Республикæйы. Мах чингуытæм гæсгæ цæттæ кæнынц чингуытæ сæхицæн, иуæй-иуты та дзы комкоммæ тæлмац кæнынц сæхи æвзæгтæм. Нæ куыстмæ сæ хъус æрдардтой Хуссар Ирыстоны дæр, æмæ, куыд фæнд кæнынц, афтæмæй нæ чингуытæй пайда кæнын райдайдзысты 2011-æм азы. Нæ фарс рахæцыд Европæйы Цæдис æмæ нын рахицæн кодта хъæугæ фæрæзтæ, цæмæй полилингвалон ахуырады бындурыл саразæм сывæллæтты рæвдауæндæтты куыст. 

Ныртæккæ Цæгат Ирыстоны педагогон институты ЮНЕСКО-йы кафедрæйæн ис цыппар дæлхайады — Хуссар Ирыстоны паддзахадон университеты, Приволжьейы федералон университеты (г. Хъазан), Цæцæны ахуырады кусджыты зонындзинæдтæ фылдæргæнæн институты æмæ Хъæрæсе-Черкесы паддзахадон университеты. Уыцы регионтæ иууылдæр разæнгардæй бавнæлдтой сæ национ æвзæгтæ хъахъхъæныны æмæ рæзын кæныны сæрвæлтау нæ фæлтæрддзинад фæзмгæйæ. 

Фæлæ мах нæхæдæг дæр нырма фæндагæн йæ райдайæны стæм. Полилингвалон æмæ поликультурон ахуырад домы дзæвгар хъуыддæгтæ бакæнын. 

Фыццаджыдæр, рæвдауæндæттæн æмæ скъолатæн фæлтæргай рауадзын хъæуы ахуыргæнæн чингуытæ ирон æвзагыл (уыдон сты 150 бæрц) æмæ республикæйы скъолатæ чингуытæй сифтонг кæнын. Сæ рауадзынæн бахъæудзæн 6–7 милуан сомы алы аз дæр (махæн та бюджеты амынд ис 1,5 милуан сомы иу азæн). Уыйбæрц æхца рахицæн кæнын республикæйы бон у суанг кризисон уавæрты дæр. Фæлæ республикæйы Финансты министрадæн бар радт, уæд нын иу капекк дæр нæ рахицæн кæнид ирон чингуытæн, нымайы сæ «ерундайыл». Зæгъын хъæуы уый, æмæ ацы ведомствойы ирон æвзаджы сагъæссаг уавæр æппындæр не ’мбарынц, уый аххосæй къуылымпыгонд цæуы республикон нысанмæарæзт программæ «Ирон æвзаг» дæр. Программæйы координацион советы уынаффæйæ хъуамæ ацы аз мартъийы нæ кафедрæйæн æхца лæвæрд æрцыдаид мыхуыргæнæн техникæ балхæнынæн. Нырыккон техникæ фæрæвдздæр кодтаид ног ахуыргæнæн чингуытæ рауадзыны хъуыддаг, стæй къаддæр хæрдзтæ бакæнгæйæ. Техникæйы фæрцы фæнд кодтам нæ чингуытæй 6000 экземпляры рауадзын — 1000 скъоладзауæн. Нæ республикæйы Ахуырады æмæ Финансты министрадтимæ баныхас кæнгæйæ, арæзт æрцыд конкурс уыцы мыхуыргæнæн техникæ балхæнынæн, контракт бафыстам конкурс рамбулæгимæ, уый нын æрбаласта техникæ, йæ аргъ ын нæма бафыстам, афтæмæй, — баууæндыдысты ныл. Дыууæ мæйы рацыд уыцы бонæй, фæлæ Финансты министрад æхца нæма арвыста, æмæ уый фыдæй махæн нæ бон нæу техникæйæ пайда кæнын, чингуытæ рауадзын — афтæмæй æрхæццæ кæны ахуыры азы райдайæн. 

Тæссаг у, федералон фæлварæн куы фæкъуыхцы уа, мингай сывæллæттæ сæ ахуыр афоныл куы нæ райдайой, уымæй. Финансты министрады та нын хуыздæр дзуаппæн фæзæгъынц: æмæ цæмæн хъæуынц уыцы ирон æвзаджы чингуытæ, цæмæн хъæуы сывæллæтты иронау ахуыр кæнын, цы пайда у ЮНЕСКО-йы кафедрæйы куыст, цæмæн хъæуы кафедрæ йæхæдæг дæр? Чи зоны, Финансты министрадæн ахæм фарстатæ лыг кæнын дæр йæ бар у, фæлæ фæрсын раздæр хъуыд, ныр та хъуамæ æххæст кæной химæрайст хæстæ, цæмæй нæ куыст ма ныкъкъуылымпы уа. Стратегион фарстатимæ ранымайдзынæн мæнæ ахæмтæ. Фæхуыздæр кæнын хъæуы ирон æвзаджы ахуыргæнджытæ цæттæ кæныны куыст, уыимæ бакусын хъæуы райдайæн кълæсты ахуыргæнджыты, музыкæйы æмæ нываивады ахуыргæнджыты, сывæллæтты рæвдауæндæтты хъомылгæнджыты профессионалон æмвæзадыл — цæмæй цæттæ уой сывæллæтты иронау ахуыр кæнынмæ. 

Æрæфы æмæ Дыгуры районты скъолаты дыгурон æвзаг кæй ахуыр кæнынц, æмæ ног ахуыргæнæн чингуытæ дыууæ диалектыл конд кæй сты, ома, ирон чингуыты ис дыгурон æрмæг, дыгурон чингуыты та — ирон æрмæг, уымæ гæсгæ рацаразын хъæуы ирон æвзаджы ахуыргæнджыты цæттæ кæныны куыст. Хъуамæ ирон филологийы факультетты рауагъдонтæ зоной аллон æвзаджы дыууæ литературон варианты дæр

Ирон æвзаджы ахуыргæнæг суæвынмæ бирæ бæллæг кæй нал ис, уымæ гæсгæ агурын хъæуы цæхгæр мадзæлттæ абитуриентты зондахаст ивынæн, ирон æвзаджы дæсныйад райсынмæ сæ разæнгард кæнын хъæуы. Ахæм мадзалыл нымайæм: Цæгат Ирыстоны паддзахадон университеты æмæ Цæгат Ирыстоны педагогон институты ногæй ирон-фæсарæйнаг факультеттæ байгом кæнын. Уый фæрцы ирон сывæллæттæн цæттæгонд цæудзæн, фæсарæйнаг æвзаг сын ног чингуытæм гæсгæ иронау чи амона, ахæм педагогтæ. 

Ирон æвзаг тагъддæр сахуыр кæнынæн, уроктæй уæлдай, хорз фæрæз уаиккой сæрмагонд сæрдыгон лагерьтæ, сывæллæттæ æрмæст мадæлон æвзагыл кæм дзурдзысты, ахæмтæ. Уыцы мадзалы ахадындзинадæн æвдисæн у дунеон фæлтæрдцзинад. Спайда дзы кæниккой Уæрæсейы иннæ регионты æмæ æндæр бæстæты цæрæг ирон бинонтæ дæр. 

Нæ телеуынынад дæр хъуамæ зæрдиагæй бацархайа æмæ нæ сывæллæттæн радта уæлæмхасæн гæнæнтæ ирон æвзаг базонынæн. Телевизорæй, радиойæ хъуамæ иудадзыг хъуыса ирон зарæг (сывæллæттæн), ирон æвзагмæ ратæлмац кæнын хъæуы мульткинонывтæ æмæ сæ æвдисын алы бон дæр. 

Ахъуыдыйаг у, йæ кары бацæугæйæ, мадæлон æвзаг нæ зонынæй йæхимæ æххæст адæймаг чи нæ кæсы, уыдоны уавæр дæр: хъуамæ сын радтæм ирон æвзаг сахуыр кæныны æмæ хи адæммæ раздæхыны фадат. Мах бацæттæ кодтам хъæугæ ахуыргæнæн æрмæджытæ ирон æвзаджы интенсивон курсытæн. Хъæуы сæ мыхуырæй рауадзын, курсытæн та — паддзахадон æххуыс бакæнын. Уыимæ, сæрмагонд курсытæ саразын хъæуы паддзахадон æмæ муниципалон кусджытæн, цæмæй дзурын зоной республикæйы дыккаг паддзахадон æвзагыл дæр (ирон æвзагыл), сæ функционалон хæстæ æххæст кæнгæйæ. 

Зын бакæнæн сты уыцы хъуыддæгтæ? О, æнцон не сты. Бирæ хæрдзтæ домынц? Бæгуыдæр, цыдæртæ нывондæн æрхæссын бахъæудзæн. Фæлæ зæрдыл дарын хъæуы уый, æмæ æппæты пайдайагдæр хæрдзтæ сты, адæймаджы уд фæхъæздыгдæр кæныныл кæй бахардз кæнай, уыдон. Нæ истори куыд амоны, афтæмæй цыфæнды экономикон æмæ социалон зындзинæдтæн æмæ суанг бæллæхтæн дæр бафæразæн ис, ногæй рæзты фæндагыл æрлæууæн. Фæлæ мадæлон æвзаг фесæфт, зæгъгæ, æмæ уый фæстиуæгæн национ культурæ, национ цæсгом дæр, уæд уыдонæн ссарæн нал ис, ницæмæй сæ ис баххæст кæнæн. Зæгъдзынæн ноджы карздæр: йæхи, йæ уд чи фесафа, уыцы адæмæн нæй аккаг политикон æмæ экономикон фидæн. Нæй йын фидæн æппындæр. 

 

 

ХЪАМБОЛТЫ Тамерлан

филологон наукæты доктор, Цæгат Ирыстоны 

паддзахадон педагогон институты 

ЮНЕСКО-йы кафедрæйы сæргълæууæг 

 

Газет «Рæстдзинад», 2010 азы 28 август



<==    Комментарии (11)      Версия для печати
Реклама: i38.ru

Ossetoans.com OsGenocid ALANNEWS jaszokegyesulete.hu mahdug.ru iudzinad.ru

Архив публикаций
  Января 2024
» О чем рассказали восточно-европейские руны
  Ноября 2022
» От Кавказа до Волги
  Августа 2022
» Кавказцы глазами русских: говорят архивные документы...
  Марта 2022
» К вопросу о заселении Фиагдонской котловины, по данным фамильных и народных преданий
» О новых именах в истории царственного дома средневековой Алании
  Февраля 2022
» К ВОПРОСУ ОБ УДЕЛЬНЫХ ВЛАДЕТЕЛЯХ УАЛЛАГКОМА ПО ФАМИЛЬНЫМ, НАРОДНЫМ ПРЕДАНИЯМ И АРХИВНЫМ МАТЕРИАЛАМ
  Декабря 2021
» Осетинская религия; религия осетин (Ирон дин)
  Мая 2021
» Иверская (Моздокская) икона Божией Матери
  Мая 2020
» Соотношение понятий Æгъдау, религия (дин), вера во внутриосетинской дискуссии
  Июля 2019
» Открытое обращение представителей осетинских религиозных организаций
  Августа 2017
» Обращение по установке памятника Пипо Гурциеву.
  Июня 2017
» Межконфессиональный диалог в РСО-Алании состояние проблемы
  Мая 2017
» Рекомендации 2-го круглого стола на тему «Традиционные осетинские религиозные верования и убеждения: состояние, проблемы и перспективы»
» Пути формирования информационной среды в сфере осетинской традиционной религии
» Проблемы организации научной разработки отдельных насущных вопросов традиционных верований осетин
  Мая 2016
» ПРОИСХОЖДЕНИЕ РУССКОГО ГОСУДАРСТВА
» НАРОДНАЯ РЕЛИГИЯ ОСЕТИН
» ОСЕТИНЫ
  Мая 2015
» Обращение к Главе муниципального образования и руководителям фракций
» Чындзӕхсӕвы ӕгъдӕуттӕ
» Во имя мира!
» Танец... на грани кровопролития
» Почти 5000 граммов свинца на один гектар земли!!!
  Марта 2015
» Патриоту Алании
  Мая 2014
» Что мы едим, или «пищевой терроризм»