Цард фæстаг азты афтæ фæивта æмæ дзы бирæтæ цæрын нал фæразынц. Уый фыдæй хистæры цæрæнбонтæ цыбырдæр кæнынц, фæсивæд фæндæгты фыдбылызты æмæ алы низты азарæй мæлынц. Зиæнттæ афтæ сарæх сты, æмæ цины дæр нæ уаг йæ бынаты нал вæййы, зианы æмæ цины æгъдæуттæ кæрæдзийæ фæхицæн кæнын нын фæзын вæййы. Афтæмæй та алыхуызон сты, алыхуызон сты сæ мидис æмæ сæ нысан дæр. Фæлæ дзы уæддæр ныдздзæгъæлтæ вæййæм. Зианы фынгыл æрцæуæг адæмы æмæ мыггаджы хистæртæ кæм хъуамæ бадой, уый хорз зонæм, фæлæ мыггаджы хистæртæн цины æртыккаг нæ, фæлæ дыккаг бынаты бадгæ у, æмæ йæ уым æгъдау дæттын кæй хъæудзæн, ууыл арæх сдызæрдыг вæййынц. Æгъдау та ахæм: хистæр фыццаг сидты бар хъуамæ уымæн радта, æмæ æмæ уæд мыггаджы номæй бадты адæмæн арфæ ракæнын, сæ циндзинады сæ фарсмæ кæй сты æмæ йыл кæй цин кæнынц, уый тыххæй. Æртыккаг хистæр та фæстæдæр уазджыты номæй расиды гаджидау фысымты цæрæнбоны тыххæй. Зианы фынгыл мыггаджы хистæр бады галиуæрдыгæй, уымæй æвдисы галиудзинад — зиан сыл кæй æрцыд, уый. Цины фынгыл мыггаджы хистæр бады рахиз фарс, рахизæрдæм — хорз хъуыддаг сыл кæй æрцыд, уый тыххæй. Стæй чызгæрвысты фынджы хистæры фæстæ мыггаджы номæй сæ чызджы рæствæндагыл уый бафтауы. Чындзхасты та чындзæн йæ амонды тыххæй арфæ ракæны.