Память о жертвах бесланской трагедии...
 Бесланское кладбище, на котором похоронены жертвы теракта |
СИТОХАТЫ Саламджери
ÆХСЫНЦ НЫН НÆ ФИДÆН
Фыдгултæ нын æхсынц нæ фидæн.
Ныр та Беслæны акалдис йæ туг.
Ныхъхъус ыстæм. Æрмæстдæр ма сæ ’лгъитæм,
Кæнæм нæ маст нæ цæссыгтæй хуыдуг.
Фыдгултæ нын æхсынц нæ фидæн.
Тæрсын, тæрсын, куы акæла йæ рындз.
О диссæгтæ! Цæф нал хъары нæ иутæм!
Фæдисмæ нæ, æхцатырдæм бырсынц.
Нымайынц иутæ доллæртæ, о, мах та
Нымайæм, охх, нæ сабиты мæрдтæ.
Фыдбоны катай мады зæрдæ скъахта,
Ныссуйтæ сты йæ кæддæры фæндтæ.
Фыдгултæ нын æхсынц, æхсынц нæ фидæн.
Нæ абон дæр фыдцæф у, уæдæ цы!
Дзыназгæ ’вналынц устытæ сæ хилтæм...
Быхсаг ыстæм... Нæ Хуыцау нæм хæцы...
 Памятник детям, жертвам теракта в бесланской школе.
Находится на бесланском кладбище |
Игорь ИРТЕНЬЕВ
МАХ НÆ — СЫМАХ
Быры — кæдæй! — егъау бæстæ йæ фазыл?
Кæй аххос у? Сымах аххос æрмæст.
Сымах ракъахтат сау тыхтона, хæст,
Фæлæ ныххуырстат иннæтыл уæ азым.
Бæрзонд бынæттæм чи бырсы? Сымах.
Нæ хицæуттæ — уæ иузæрдыг чапартæ.
Уæ алкæй цæрæн — дур-фидар, гæнах,
Бынæй та — мах. Уæ дзæмбыты — нæ бартæ.
Уæ алыварс — гуыппырсартæ-гæстæ,
Уынгæджы бон æфснайд ысты уæ сæртæ.
Рæмудзынц мах та, иблисты хæстæй
Нæй алидзæн — ыссыхырна нæ зæрдæ.
Бæсты бæркæдтæ чи ’мпулы? Сымах.
Уæ лæвар нын — цъиахтæ-олигархтæ.
Уæ фæрцы бадынц уыдон хъултæ сах,
Дæлæмæ ныл уæлиауæй — гæрæхтæ...
Ис махмæ дæр, ай-гъай, æрхæссæн фау:
Уæ бæрны та уын бакæнæм нæ бæстæ,
Фæдæттæм уын нæ хъæлæстæ æфстау,
Сымах та не стут фидинаг уæ хæстæ.
Хъодзаты Æхсары тæлмац
 Это памятник жертвам бесланской трагедии от детей Армении
и Александра Гивоева. Установлен в Беслане |
КЪАДЗАТЫ Станислав
* * *
Ацæуын æнцон у,
Тынг зын у ныууадзын —
Удæн ам æхцон у
Алцыдæр æвдадзау.
О, фæлæ дзы хæйрæг —
Кувæндоны хицау,
Уый — бæллæхты сæйраг,
Уый къухы — къæбиц дæр.
Зинтæ махмæ — минтæй,
У сæ бар нæ рæбын,
Хинтæй ныл сæ цинтæ,
Зæдтæ та — æрвгæрон.
Цард — цъымара, хъамыл —
Сау фыдæх куы зæрды.
Зæрдæ уымæн — саджил,
Уымæн ис дызæрдыг.
Фæлæ ис Фыдызæхх,
Ис нæртон дзырды фарн!
Уыдон ма — зынг-сыгъдæг,
Уыдон ма — æрвыг-арф!
2004.31.08
 Памятник детям, погибшим в Беслане. Владикавказ |
КЪАДЗАТЫ Станислав
* * *
Никуы уыд æдзæсгомдæр
Ацы цъаммар дугæй —
Асæрфы йæ цæсгомæй
Ту дæр æмæ туг дæр.
Фæлæ рæстæг мах ыстæм,
Адæмтæ, нæ бæстæ.
Оххай-гъе, ныссагъдыстæм
Цъымарайы цæсты!..
2004.10.09
[Æмдзæвгæтæ ист ысты журнал «Мах дуг»-æй, 2004, №11]
 Памятник детям Беслана в Мураново Московской области |
 Памятник жертвам терактов во Владикавказе |
 Памятник Дмитрию Разумовскому, бойцу отряда «Вымпел»,
погибшему при освобождении бесланской школы |
 Памятник детям Беслана в государстве Сан-Марино |
 Памятник жертвам бесланской трагедии в Москве |
 Памятник детям Беслана в Петербурге |
 Памятник погибшим спасателям и спецназовцам на бесланском кладбище |
