Ирон адæм марды æгъдæутты æрвылбон дæр архайынц, уæддæр сæм уыдоны тыххæй фылдæр фарстытæ æвзæры. Æвæццæгæн, адæймагæн йæ адзал куыд сусæг у, афтæ æмбæхст, æнæмбæрст хъуыддæгтæ баст ис йæ марды æгъдæуттимæ дæр. Зæгъæм, мардæн фынджыдзаг хæлар кæнгæйæ, стæй хæрнæджы фынгыл рухсаг зæгъгæйæ, нозтæй цæмæн æркалæм? Ацы фарстæн мын Томайты Елмырзæ ахæм дзуапп радта: «Æз нæ хистæртæй куыд фехъуыстон, афтæмæй-иу хæлар кæнгæйæ кæнæ рухсаджы рæгъы нозтæй чысыл куы æркалдтой, уæд-иу загътой: «Амæй дарддæр дæ дзы æнæбары хай бакæнын макæмæн бахъæуæд». Уый амоны: мах раз куыд сты, афтæ дæ разы дæр уæнт, сæрд дын æмбийгæ ма кæнæнт, зымæг — сæлгæ. Мачи дын сæм мацы бар дарæд, æвæндонæй дæ дзы искæмæн дæттын ма бахъæуæд. 

О, фæлæ ма уæд адæммæ фарст «Алы рухсаджы рæгъы дæр нозтæй калгæ у?» цæмæн сæвзæры? Хæрнæджы фынгæн цы фæхъæуы, уыдон иууылдæр иумæ дыууæ кæнæ цыппар хистæры мардæн йæ хæдзары ныххæлар кæнынц, нозтæй æркалгæйæ. Уый фæстæ йын бадты адæм иууылдæр рухсаг фæзæгъынц йæ рухсаджы рæгъы æмæ дзы нозтæй алчидæр æркалы. Фæлæ ма вæййы, цы мæрдтæм бацыд, йæхæдæг рухсаг кæмæн кодта, уыцы зæронд мæрдты, Фыдыбæстæйы Стыр хæстæй чи нал сыздæхт, уыдоны рухсаджы рæгъытæ. Уæдæ йæ мæрдты бæсты Мыкалгабыртыл дæр бафæдзæхсын фæхъæуы — бæркæдтыл æфтауæг уыдон сты, æмæ сæ хъомыс мæрдты бæстæм дæр æххæссы. Ацы рæгъыты дæр иутæ нозтæй æркалынц, иннæтæ та фæзæгъынц: «Не ’мбæлы». Æмæ, æвæццæгæн, раст сты, Томайты Елмырзæ нозт цæмæн æркалынц, уый тыххæй куыд зæгъы, уымæ гæсгæ.