Ныры дуджы куывдмæ, чындзæхсæвмæ, уæлдайдæр та зианмæ, бирæ адæм цæуы, æмæ бадты афон каст вæййы, фынджы хистæртæ кæд æмæ кæм æрбаддзысты, уымæ. Хистæры æрбадын кæнынц уæлейæ, йе ’ргом хурыскæсæны ’рдæм куыд уа, афтæ. Уый раст у, уынджы æвæрд куы амона, уæд. Куы нæ амона, уæд та? Арæх нæм ацы фарсты фæдыл быцæутæ рауайы.
Фынджы хистæрæн йе ’ргом хъуамæ уа хурыскæсæны ’рдæм. Уый, ахæм фадат куы уа, уæд. Фæлæ хъæуы уынг, хæдзары æвæрд, уат уымæн гæнæн куы нæ дæттой, уæд та хистæры æргом хъуамæ здæхт уа æрбацæуæнмæ: адæм уынгмæ, хæдзары кæртмæ кæцырдыгæй цæуынц, уаты та — дуары ’рдæм. Цæмæй, æрмæст фынгыл нæ, фæлæ уынджы, кæрты, уаты цы архайд цæуы, уый дæр уына. Къæхты бын нæ, фæлæ хъуамæ рæбыны бада хистæр, цæмæй уына лæггадгæнджыты æгъдау дæтгæйæ, ног æрбацæуджыты. Лæггадгæнджытимæ баст сты йæ хæстæ, ног æрбацæуæгæн та хъуамæ йе ’гъдау скæна. Уый тыххæй зианы фынгыл йæ галиуварс хъуамæ æрлæууæн уа. Уыцырдыгæй — уырдыглæууæг дæр. Ног æрбацæуæг хистæры галиуварс куы æрлæууы, «зиан рухсаг уæд, хæрзмæ уыл аудæд, фылдæр рæсугъд фынгтыл куыд бадат», зæгъгæ, уæд æм хистæр агуывзæйы нозт авæры, мардæн ын рухсаг фæзæгъын кæны, стæй йæ уырдыглæууæгæн фынджы кæрон æрбадын кæнын кæны.
Цины фынгыл уырдыгыстæг лæууы рахизæрдыгæй, хистæры рахизфарс. Æрбацæуæг ног адæймаг, стæй нуазæнтимæ дæр йæ уæлхъус æрлæууынц рахизфарс. Ног æрбацæуæг фæзæгъы: «Фарн уæ бадты, хъуыддаг — амондджын!» Хистæр ын æмбæлæггаг радты, стæй та уый дæр уырдыгыстæджы бар бакæны.
