Фæззæг сарæх вæййынц чындзæхсæвтæ. Гъе æмæ фарн иу хæдзарæй иннæмæ фылдæргæнгæ куыд цæуа, ирон адæм кæрæдзийы фарнæй амондджындæр, тыхджындæр куыд кæной, æнгомдзинады æнкъарæнтæ сыл куыд бафтауой, ахæм арфæ сæ уæд. Алы хистæры, къухылхæцæджы, æмдзуарджыны дзыхы дæр фарн куыд уа, сæ ракуывдытæ Ирыстоны зæххыл Хуыцауы фæрцы царды уагъд куыд æрцæуой, уæлдайдæр та хызисæджы: «Фарн, фарн, фарн! Фараст лæппуйы æмæ иу чызг» Хуыцаумæ хъæрдæрæй куыд фехъуыса, æмæ алы бинонты хæдзар дæр сабитæй æмызмæлд куыд кæна, ахæм арфæ æрцæуæд ирон адæмыл. 

Бæркадджын фæззæг чындзæхсæвтæн у. Стæй чындзæхсæв æнæзарæгæй нæ фидауы, æмæ хатт чындзхонтæ зарæджы ныхæстæ нæ фæзонынц, æмæ сын, табуафси, «Чындзхæсджыты зарæджы» ныхæстæ: 

Ой, фæцæуæм уæм, фæцæуæм, 

Ой, амондджын къах фæхæссæм! 

Ой, уæ бон хорз уа, нæ фысымтæ, 

Ой, æгас фæцæуой уазджытæ! 

Ой, арфæгонд уæнт бæлццæттæ, 

Ой, хъæлдзæг нын уой уазджытæ! 

Ой, фарнимæ уæм фæцæуæм. 

Ой, амонд немæ фæхæссæм! 

Хъуыддæгтæ амондджын æрбауой, 

Ой, рæствæндæгтыл фæцæуой! 

Ой, хорз æмбæлæг ныл сæмбæла, 

Ой, хорз арфæтæ нын ракæна! 

Ой, не ’мбæлæг — хæрзæмбæлæг! 

                * * * 

Уæлæ хъæды давонджын! 

Ой, нæ хъуыддæгтæ — амондджын! 

Цæй, уазджытæ, рæствæндаг, 

Уæ фæндонæй фысымтæ — хæрзæхсæв! 

Махæн хорз æмæ не ’мбæлæг 

Амондджын бон араст уæд, 

Амондджын къахдзæф акæнæд! 

Сырддонцъиу бæласæй ратахти, 

Бæласы къалиуыл абадти. 

Чындздзон чызг хæдзарæй рараст и, 

Иннæ хæдзармæ бацыди. 

Фарн фæцæуы, не ’фсинтæ, 

Хæрзæмбæлæг æрбаут!