Дæу иу æрра лæг сарæзта мæ марынæн; 

Мæ риуимæ дæ фындз ыссис æмарæн. 

...Уæд цъаммæрттæ фæхуддзысты сæ дзыхы дзаг. 

Уæд, зонын, алчи, алчи дæр мыл худдзæн, 

Фæлæ уыдзынæн æз зæндджындæр уыдонæй: 

Зæххы къорийыл иунæгæй бæрзонд лæугæ, 

Æз зондзынæн, æз зондзынæн æрмæст — 

Цæссыг калынæй туг калын хуыздæр у! 

Дæу иу æрра лæг сарæзта мæ марынæн; 

Мæ риуимæ дæ фындз ыссис æмарæн. 

Мæ зæрдæйы рæхджы кæрддзæм куы ссарай, 

Уæд иунæг уд, мыййаг, куы кæна марой... 

Зæгъ-ма, зæгъ-ма, мыййаг, кæд уый кæудзæн, 

Уæд а ‘рра дуне не ‘рхатдзæнис никуы — 

Йæ иу æрвгъуыз цæссыджы аргъ кæй нæу. 

Æмæ мæрдты цы баззади мæнæн, — 

Йæ цæссыджы раз зоныгыл лæудзынæн. 

Йæ цæссыгмæ ныддардзæн хур йæ тын. 

Æз уыцы тыныл атындздзынæн арвмæ, 

Æнæуæзау уым уæлдæфы цæудзынæн 

Ыстъалыйæ ыстъалымæ гæппгæнгæ; 

Мæ зæрдæ хурæй фестдзæнис ыстырдæр, 

Æмæ ныллæудзæн сау зæхмæ мæ удæй 

Сыгъзæрин доны бур-бурид цыхцыртæ; 

Сыгъзæринæй куы сахуырсой сæ удтæ, 

Уæд ничи худдзæн, ничиуал мæныл. 

Кæй ыслæууыдтæн уыдонæй бæрзонддæр, 

Кæй зонын кувын, рухс хуыцæуттау уарзын, 

Ныббардзысты мын уый хæларæй уæд. 

Æмæ мæ хæдзар, ме ‘нусон хæдзар, — 

Мæ зæххы къори кувæндон уыдзæн, 

Æмæ мæ хæлар, ме ‘мтуг адæм се ‘ппæт 

Ыссудздзысты бæсты сæры тых — уарзтæн, 

Муртаттæгтау, сыгъдæг мыдадз цырæгътæ. 

Дæу чи сæнтдзæф лæг сарæзта мæ марынæн?! — 

Ис не ‘хсæн зæххæй арвмæйы ‘мбæрц арæн. 

27.09.1969