Цъæх арвыл-иу цæлхыдзаг мæй куы стылд, 

Цыдыстæм-иу уæд ацы талмы цурмæ; 

Дзырдтам-иу ам нæ сомбоны куыстыл, 

Нæ бæллицтæ-иу тахтысты зынг хурмæ. 

Уыдис талм махыл афтæ иузæрдыг, — 

Хъæццулау нæ йæ сыфтæртæй æмбæрзта: 

Цыма мæ уарзон цкурайы фæрдыг, 

Дæ мадæй тынг кæй тарстæ, уый æмбæрста. 

Уæд иу афоны нал разындтæ ды... 

Æнæрхъуыдыйæ систон æз хырынкъа, 

Нæ бæласы зæбул цонгыл, сæттын, 

Дæ ном ныффыстон карды цыргъ бырынкъæй... 

Нæ уарзты бонтæй иу фæлтæр фæци... 

...Æрæджы та куы рыздæхтæн нæ хъæумæ, 

Цы ма мæ хаста бæласмæ мæ цин? 

Цы ма кастæн йæ рæвдыдмæ æнхъæлмæ?.. 

Уый бафхæрдта мæ бафтаугæ хъæдгом 

Æмæ мæ разы цонгхусæй лæууыдис, 

Куы зыдтаид: фыст ыл кæй уыд дæ ном, — 

Æнустæм дæр ын хусгæнæн нæ уыдис: 

Дæ уарзондзинад уыцы ном мæнæн 

Мæ зæрдæйыл цæхæр уæхстæй ныффыста, 

Æмæ йын нал ис уый адыл мæлæн, — 

Прометейы фидар зæрдæ фестад... 

1955 аз