I 

Саувадыджы ф’ аууон и мæ уарзт, 

Атыхстис мæ циныл мигъау хъыг; 

Ракастæн мæстæлгъæдæй æваст, — 

Æз цæссыг дæн, судзаггаг цæссыг. 

Риуæй ныфс æхсинæгау ыстахт, 

Арвæрттывдæй айдзаг и мæ уд. 

Дидинæг-бæллицтæн дзы уайтагъд 

Ахуыссыд сæ хъæлдзæг мидбылхудт... 

Рухс цинæн дзы нал аззад йæ гуырдз, 

Уалдзæг дзы хæкъуырцкуыдæй кæуы; 

Хуры уадул — чъиллæттæ, хуылыдз, — 

Мигъы хъарм цæстысыг ыл цæуы... 

                II 

Ме стъалы мæм аивæй фæхудт... 

Æз цæссыг дæн, амонды цæссыг — 

Рухс цырæгътæй айдзаг и мæ уд. 

Судзы мæ уæларвон арты зынг. 

Хур мæ мидæг ленчытæ кæны, 

Ферттивынц мæ стъалытæ чыртæй. 

Уалдзæгæн — мæ цæстыты йæ ныв, 

Мигъы бындзыг, мигъы къæм мæ нæй. 

Амонд арвы гом дуарæй фæзынд, — 

Зæрдæ ссыгъди, уый ма йæ хъуыди! 

Иу пæррæстæн авд хохыл æрзылд 

Ам-цъыкк, уым-цъыкк цинцыбæл хъуыды... 

                III 

Систа маст мæ бæллицтæй йæ хыз, 

Æз цæссыг дæн, рухс цины цæссыг; 

Минхуызты та сырттывта мæ ныфс, 

Уый мæ мидæг арвырон ыссыгъд; 

Карз тохы нæ бацæудзынæн, цы, — 

Ма уа цардæй иунæг уысм æнуд! 

Уадтымыгъ, æнхъæлмæ дæм кæсы, 

Уарийы тыгъд базырыл мæ уд!