Профессор Фрейман Ленинграды мыхуыр кæны дзырдуат, фæлæ мæм уый ницæйаг дзырдуат кæсы. Æз сфæнд кодтон хицæн дзырдуат саразын.
Абырæгдзинад — Цæгат Ирыстоны рын. Никæцы дохтыр ссардта нырма хос уыцы сæйгæ рыны ныхмæ.
Алименттæ — нæлгоймагæн хъадаман, сылгоймагæн: базыртæ.
Англис — бирæгъты æрдонг, кæцы зилы зæххы алы къуымты, кæуыл æмæ цæуыл æмбæлы, уыдон стигъы, æргæвды.
Æвзаг —
1) адæймаджы буары хай, иуæй-иуæн дзыхæй æддæмæ нæ зыны, иуæй-иуæн та сахары иу кæронæй иннæмæ æххæссы;
2) адæмæй чи иуæвзагон вæййы, чи та дывзагон.
Бæлас — ахæм рæзинаджы мыггаг, кæцыйæн рæхджы Хуссар Ирыстоны йæ кой дæр нал уыдзæн нарком æмæ совнархозы фæрцы.
Гæды —вæййы фос, адæймаджы аргъæуттæй сайы; вæййы бæлас, адæймаджы йæ рæсугъд уындæй сайы; вæййы адæймаг дæр, иннæ адæймæгты ныхæстæй сайы.
Гон — хордон, мыстытæ адæймагæй хъалон уым фæисынц.
Грамматикæ (Æлборты Барисы фыст) — иронау дзурын æмæ фыссын куыд нæ хъæуы, уый амонæн чиныг.
Дон — цæгатирыстойнаг арахъхъ.
Дзоныгъ — адæймаджы сæры хай, аууон ран хулиганы тымбылкъух фыццагдæр ууыл аныдзæвы.
Дунейы фарн — ног хуыцау, нырма хæрз лæппу у, фæлæ ирон коммунисттæ æмæ комсомолтæ æндæр ницæмæн уал кувынц.
Бæлта — райдзаст зæххы гæбаз, кæддæр уыдис ирон адæмæн цæрæн бынат, ныр та ма сын у æрмæст станцæ Арвыкомы фæндагыл.
Заседание —æвдæлон адæмæн дзæнгæдадзæгъдæн æмбырд.
Ингæн — адæм — хъæздыгæй, мæгуырæй — æмхуызон уым свæййынц.
Ирон — ахæм адæмы мыггаг, æмæ дзы дыууæ адæймаджы иумæ куы фембæлынц, уæд кæрæдзи бахæрынц æмæ дыууæ дæр фесæфынц.
Кепкæ — сæ.ры дарæс, иртасы пролетарон адæймаджы -буржуазийæ.
Китай — æдзæлладжы хуым, йæ хицау йæ кæрæтты цæуы, иннæ адæм та йæ астæуты.
Коллеги — цæуæджы къахыл къодах.
Къамбец — гуырдзиаг трактор.
Модæдартæ —мæнг коммунистытæ æмæ сæ фæддзутæ. «Мах буржуазон дарæс нæ дарæм», зæгъгæ, дарынц æнахъинон сæрыдарæс адыли бырынчъытимæ. Сæ куырæтты дæгътæ сын хæйрæг равзарынмæ хъавыди, фæлæ ницы йæ бон баци æмæ æгадæй фæлыгъди фæстæмæ дæлдзæхмæ.
Муссолини — италиаг цъиусур.
Национализаци —1) ирон оцани бæх, 2) удхæссæг кæмæндæрты нæ бæрнон кусджытæй.
Наркомздрав —фæллад дохтыртæн фæлладуадзæн бынат.
Объединение — Цæгат æмæ Хуссар Ир уæрдонæй тæрхъус ахсынц.
Оратор — ривадæй зилæг куырой.
Рæстæг —маргъы мыггаг, кæмдæриддæр ын стыр кад :ис Ирыстон йеддæмæ.
Фарн — маргъы мыггаг, къæбæда ныхас кæм хъуысы, уырдыгæй дард айсы йæхи.
Фæндыр — афтид хæдзарæн ирхæфсæн дзаума.
Цæсгом — адæймаджы буары хай, иуæй-иутæн ис, иу-æй-иутæн нæй.
Цæстытæ — уынæн уæнгтæ адæймаджы цæсгомыл, уынынц æрмæст искæй сахъæттæ, искæй æвзæрдзинæдтæ.
Цъæй — риунизджынтæн дзыппафтидгæнæн, профессор Мисиковæн та дзыпдзаггæнæн бынат.
Цъон — Хуссар Ирыстоны бæрнон кусджытæн цуаны бынат.
Чжан Цзолинь — ахæм китайаг, кæцы æгас Китайы адæмы уæй кæны президенты бандоныл.
Чан Кайши — китайаг лæг, дыууæрдæмзæвæтджын.
Чъреба — Хуссар Ирыстоны сæйраг горæт, дзурынц дзы алы æвзагыл ирон йеддæмæ.