Музуккагæн йæ фæрæт цæугæдоны ныххауд. Æрбадт доны был æмæ фырзæрдæрыстæй кæуын райдыдта. 

Донбеттыр ын фехъуыста йæ кæуын, фæтæригъæд кодта музуккагæн, доны бынæй йæм сæвдыста сыгъзæрин фæрæт æмæ йæ фæрсы: 

— Мæнæ ацы фæрæт у дæу? 

Музуккаг загъта: 

— Нæ, уый мæ фæрæт нæу. 

Донбеттыр рахаста æндæр, æвзист фæрæт. Музуккаг та йын загъта: 

— Уый дæр мæ фæрæт нæу. 

Уæд Донбеттыр доны бынæй рахаста æцæг фæрæт. 

Музуккаг æм дзуры: 

— Гъе, гъеуый мæ фæрæт у. 

Донбеттыр уæд æртæ фæрæты дæр балæвар кодта музуккагæн, рæстдзинад кæй загъта, уый тыххæй. 

Лæг сæхимæ куы ацыд, уæд йе ’мбæлттæм равдыста фæрæттæ æмæ сын радзырдта, цы хабар ыл æрцыд, уый. 

Уæд музуккæгтæй иу сфæнд кодта раст афтæ бакæнын: ацыди доны былмæ, йæ фæрæт барæй доны ныппæрста, былгæрон æрбадт æмæ ныккуыдта. 

Донбеттыр æм рахаста сыгъзæрин фæрæт æмæ йæ бафарста: 

— Ацы фæрæт дæу у? 

Лæг ныццин кодта æмæ загъта: 

— Мæн у, мæн! 

Донбеттыр ын нæ радта сыгъзæрин фæрæт, стæй йын йæхи фæрæт дæр нал рахаста, раст кæй нæ загъта, уый тыххæй.