«Рагæй хъуыды кæнын дыууæ хъуыддагыл. Сæ иу — зианмæ йæ лæдзæджы æнцæйтты чи æрбацæуы, уый тæфæрфæс ракæныны размæ йæ лæдзæг искæмæ цæмæн радты, кæнæ йæ иуварс зæхмæ цæмæн аппары? Лæдзæгимæ цæуылнæ æмбæлы тæфæрфæс кæнын? Дыккаг — зианы кæндты бæгæны куы вæййы, уæд дзы, хæлар кæнгæйæ, фæткъуы цæмæн ныппарынц?» Уыдис ахæм фæрсæг дæр. 

Амæлын фыдохы хабар у, æмæ фыдохы æгъдæуттæ кæнын домы. Бинонтыл, мыггагыл, хиуæттыл зиан æрцæуы, уымæй исбоны зиан нæ, фæлæ уды зиан, æмæ дзы мард, амард зæгъын дæр зæрдæ нæ фæкомы. Фылдæр хатт дзурæм, кæд раст нæу, уæддæр марды бæсты зиан, амарды бæсты фæзиан. Уымæн æмæ нæм ацы дзырдтæ зæгъын æгæр карз æмæ æвирхъау кæсынц, æвзаг сæм нæ тасы. Мард кæй къонайыл æрцæуы, уый фарсмæ балæууын, йæ хъыг, йæ маст æмæ уды хъуырдухæн ын дæ иузæрдиондзинадæй фæрогдæр кæнын алчидæр нымайы йæ хæсыл. Рынчын дæр лæдзæджы æнцæйтты уымæн æрбацæуы. Фæлæ хъыг кæнгæйæ, æгъдау хъуамæ уа йæ уагыл. Ома, къухтæ дæлæмæ уагъдæй, гæзæмæ сæркъулæй æрлæууа зианджыны раз æмæ афтæмæй ракæна тæфæрфæс. 

Уымæ нæ сарæхсдзæн, лæдзæджы æнцой лæугæйæ, æмæ, къуылыхæн æнæ лæдзæг æрлæууын кæд тынг зын вæййы, уæддæр ныффæразы. Уымæй дæр зианджынæн æвдисы, йæ рисыл тынг кæй риссы, сæ зын сын арф кæй æнкъары, æнæ лæдзæгæй лæууын ын кæд зын у, уæддæр æгъдау кæны. 

Адæмы фарн сыл æфтауы, цæмæй се стыр хъыджы раз зæрдæйæ уой фидардæр, хъæддыхдæр. Адæмы фарн та бирæ у, тыхджын у, адæймаджы цыфæнды зыны дæр фæтасын нæ уадзы.