Зианы фынгыл бæркад куы фæзæгъынц, уæд марды бафæдзæхсынц мæрдты Мыкалгабыртыл. Цæмæн? Мæрдтæн дæр Мыкалгабыртæ ис? — арæх фехъусæн вæййы бирæтæй ацы фарст.
Ирон адæймаджы динон дунембарынадмæ гæсгæ æппæт дæр сфæлдыста Иунæг Стыр Хуыцау. Уый æвастæй дунейы ницы цæуы. Уыцы архайды йын æххуысгæнджытæ сты йе сконд зæдтæ æмæ дауджытæ. Адæймаг зæххыл цæры уыдоны аудындзинады фæрцы. Уыдонмæ кувы, æгъдау сын кæны, æмæ йын уыдон дæр йæ хорз ракæндæн хорзæй дзуапп дæттынц. Зæгъæм, Уацилла йын тыхкъæвдатæй, ихæй, лæсæнтæй хъахъхъæны йæ хоры хуымтæ, архайы, цæмæй дзы фылдæр тыллæг сиса, бæркад дзы уа. Хоры Уацилла дæр æй уымæн хонынц. Фæлвæра та йын ахъаз у йæ фосы бæркадæн: низ сæм нæ уадзы, сæ зæйц сын фылдæр кæнынæн ахъаз кæны. Хæдзарон фос уый къухты сты, æмæ йæ Фосы Фæлвæра дæр уымæн хонæм.
Ацы дыууæ бардуаджы къухты бæркад у сæйрагдæр, адæм цæмæй цæрынц, уый. Мыкалгабырты та хонынц бæркадæфтауæг, фылдæргæнæг, фыдбылызсафæг. Уыдонæн сæ бархъомыс хæццæ кæны Мæрдты бæстæм дæр. Адæймаг куы амæлы, уæд æм ницыуал бар дарынц Уацилла æмæ Фæлвæра. Сæ хоры æмæ фосы кондæй йын удæгæстæ цы фынгтæ æрцæттæ кæнынц, уыдон ын ныххæлар кæнынц, фæзæгъынц, мах раз куыд бирæ сты, афтæ уæнт дæ разы дæр, зымæг дын сæлгæ ма кæнæнт, сæрд та — æмбийгæ, зæгъгæ. Ома, сæ фæндон у, цæмæй æдзухдæр хæрынæн бæзгæ уой. Æмæ ма уый нæ, фæлæ йын сæ Мæрдты бæсты Мыкалгабыртæ фылдæр куыд кæной. Уыдонæн уый сæ бон у — бæркад æфтауæг сты, æмæ сæ хъомыс уырдæм дæр ахады. Гъе уымæ гæсгæ, марды бафæдзæхсынц Мыкалгабыртыл дæр.
