Бæрæгбоны
— О, Стыр Хуыцау! Æмбал кæмæн нæй, Цытджын иунæг Хуыцау, табу дæхицæн!
— Ирыстон, ирон адæм — де уазæг!
— Афæдзæй-афæдзмæ дын нæ сахарты æмæ хъæуты цæрджытæ дæ ном æдзухдæр æртыгай чъиритæй куыд арой, ахæм арфæ нын ракæн!
— Де сконд зæдтæ æмæ дауджыты хорзæх дæр нæ уæд!
— Уæ тæхгæ-нæргæ сыгъзæрин Уастырджи, Хуыцауæй ирон адæммæ, ирон адæмæй Хуыцаумæ — дыууæрдæм минæвар дæ, Хуыцаумæ фæндаг дын уæгъд у, æмæ нæ йæ аудындзинадæй хайджын кæн!
— Нæ кæстæртæ — де уазæг!
— Фыдбылызæй сæ хиз!
— Хетæджы Уастырджи, ирон адæмы Цæгатæй-Хуссарæй, хохæй-быдырæй иу кæныс, фарн сыл æфтауыс. Сæ ныфс дæ, нымдгæнгæ дæ бынмæ кувынмæ, курынмæ цæуынц, æмæ сæиу курдиаты рæстæг дæ хорзæхæй барæвдау.
— Хуыцаумæ кувæг ирон адæм стæм. Нæ хæхбæстæ — зæдбадæн, нæ быдыртæ — бæркадбарæн. Хохæй-быдырæй Ирыстоны цыдæриддæр зæд æмæ дуагæн кувæндон ис, табу уæхицæн.
— Æмзонд, æнгомдзинад ныл бафтаут!
— Алы адæмтимæ у нæ цард, æмæ кæрæдзи куыд æмбарæм, уымæн ахъаз кæнут!
— Уæ, сыгъдæг Мады-Майрæм, моймæдзыд сылгоймæгтæ де ’вджид сты, æмæ сыл дæ хорзæх тау!
— Дæ лæвар кæстæрты нымæц ирон адæммæ фылдæрæйфылдæр куыд кæна!
— Лæппутæ дзы фылдæр куыд уа!
— Ирыстон кæхцгæнæнты куывддон куыд суа!
— Аларды, низæй сæ бахиз!
— Тхосты дзуар, тыхгæнæг сæм ма ’рбауадз!
— Æрджынарæджы Дзылаты, Арыхъы Дурджын бæрзонды, Цыргъобауы зæдтæ, табу уæхицæн! Нæ кæстæртæ зæххон æмæ уæлдæфон фæндæгтыл уæ рæзты цæуынц, æмæ сæ фæндараст кæнут!
— О, Хоры Уацилла æмæ Фосы Фæлвæра, табу уын кæнгæ уæ курæм фæрныгад: хор æмæ фосæй нæ гонтæ æмæ уæтæртæ дзаг куыд уой!
— Реком æмæ Мыкалгабыртæ, бæркадæфтауæг стут, æмæ нæ бæркæдтæ Сидæны цæхгæрау уæле — исгæ, бынæй — ахадгæ куыд уой, уыцы арфæ ныл рауадзут!
— Уæдæ нæ Бынаты бардуаджы хорзæх дæр уæд!
— Ирыстоныл армдарæг цыдæриддæр зæдтæ æмæ дауджытæ ис, уыдон ыл æдзухдæр аудæг куыд уой, фарн æмæ йыл амонд куыд æфтауой.
— Нæ бынат арфæйаг куыд уа!
— Кæддæриддæр нæ бынæтты куывдтæ æмæ чындзæхсæвтæ куыд кæнæм!
— Афтæ ма цы зæд, цы дуаг зæгъдзæн, мæнмæ дæр куы скуывтаиккат, уæд уын æз хуыздæр фæахъаз уыдаин, уымæн дæр табу!
— Ныхасы Уастырджи, табу дæхицæн!
— Нæ ныхæсты фарн æмæ амонд куыд уа!
Нæ кувын Хуыцаумæ, йе сконд зæдтæ æмæ дауджытæм куыд хъуыса, уыцы арфæ нæ ныхæстыл бафтау!
— Аходæггаг — кæстæрмæ. Уый хуры тынау нырма сыгъдæг, æнæхин у, æмæ кувинагæй хъуамæ фыццаджыдæр уый сахода.
Уастырджимæ
— Уæ сыгъзæринбазыр Уастырджи, табу дæхицæн!
— Хуыцауæй ирон адæммæ, ирон адæмæй Хуыцаумæ — дыууæрдæи минæвар дæ, Хуыцаумæ фæндаг дын уæгъд у, æмæ-иу курдиаты бон йæ хорздзинæдтæй нæ адæмы фæхайджын кæн.
— Ирон адæмы дæ рахиз базыры бын дар!
— Рæстæрдæм сыл ауд!
— Хуыцауы фыдæхæй сæ хъахъхъæн!
— Йæ хорзæх сыл тау!
— Ды роды гал кæныс, байраджы — бæх, лæппуйы — лæг, æмæ нæ кæстæртæ де уазæг!
— Фыдбылызæй сæ бахиз!
— Бынаты æмæ фæндагыл дæр — кæддæриддæр дзæбæх куыд уой, уыцы арфæ сын дæ цæст бауарзæд!
— Уæ зæлдагбоцъо уæларвон Уастырджи, зæхмæ ирон адæмиæ Хуыцауы разæй ратæхыс, æмæ де ’рбадæн бынæттæ алы ран дæр кувæндæттæ систы. Иром адæммæ цытджын дæ, сæхи дыл фæдзæхсынц, æмæ сæ дæ хорзæх уæд!
— Лæгты дзуар дæ, æиæ Ирыстоны лæгхъуаг макуы ныууадз!
— Хетæджы Уастырджи, Тымбылхъæды дзуар, ирон адæмы Цæгатæй Хуссармæ, Хурыскæсæнæй Хурныгуылæнмæ иу кæныс, фарн сыл æфтауыс, æмæ табу дæхицæн!
— Сæ ныфс дæ, нымдгæнгæ дæ бынмæ кувынмæ, хорздзинад курынмæ цæуынц, æмæ сæ-иу курдиаты рæстæг дæ хорзæх уæд!
— Нæ зæххыл сабырдзинад куыд æрфидар уа!
— Адæм кæрæдзимæ æхцайы цæстæй æмæ топпы кæсæнæй куыд нал кæсой!
— Се ’хсæн хæрзаудæны æнкъарæн куыд фæтыхджындæр уа!
— Алыхуызон адæмтимæ у нæ цард, æмæ кæрæдзи куыд æмбарæм, æмдзæринæн куыд бæззæм, уымæн ахъаз бакæн!
— Ирыстон, ирон адæм фыдохы цаутæй, фыдбылызы хабæрттæй хызт куыд уой!
— Нæ фæсивæды тыхы сæр куыд никуыуал бахъæуа! Зонд æмæ арæхстдзинадæй дунейы дæр уæлахизтæ куыд кæной.
Тархъæды бæлæстау æнгом куыд уой! Цардыл сæ бафтау! Фылдæрæй фылдæр куыд кæной!
Нæ омменгæнджыты цæрæццаг хъæлæс арвмæ куыд хъуыса!
Ноггуырды цæрæнбон
— О, не сфæлдисæг Стыр Хуыцау, табу дын.
— Зæххыл æппæт дæр ды скодтай, а хæдзары ноггуырд дæр ды радтай æмæ йæ цæринаг фæкæн.
— Дæ хæрзтæй хайджын куыд уа.
— Йæ ныййарджыты фæндиаг куыд бахъомыл уа.
— Æххæст лæг дзы куыд рауайа.
— Йæ бинонтæн.йæ мыггагæн нæ, фæлæ æппæт Ирыстонæн дæр кадгæнæг куыд уа.
— Йæ зонд,йæ хъаруйæ йæ амонд фылдæр куыд уа.
— Де сконд зæдты æмæ дауджыты хорзæх дæр æй уæд.
— О, сыгъзæрин Уастырджи, ды байрагæй бæх кæныс, лæппуйæ — лæг æмæ де уазæг фæуæд.
— Царды зын фæндæгтыл æй дæ рахиз базыры бын кæн.
— Дæ хъомысæй йæ фæтасын макуы бауадз.
— Уæлахизтæм ын йæ фæндаг сыгъдæг кæн.
— Зонд æмæ хъаруйæ, ныфс æмæ тыхæй дзы нæртон гуырд куыд рауайа.
— Адæмæн лæггад кæнынæй куыд нæ фæллайа.
— Уæ Мады зæд æмæ Мады Майрæм, авды хистæр æй фæкæнут.
— Аларды, ноггуырд саби де ’уазæг.
— Низтæй йæ бахъахъхъæн.
— Амонд ыл бафтау.
— Тхосты дзуар,табу дæхицæн.
— Тыхгæнæгæй йæ бахиз
— Тыхы сæр-иу æй куы бахъæуа.уæд ыл тыхгæнæг тых куыд нæ кæна.
— Хоры Уацилла æмæ Фосы Фæлвæрайæ дæр рæвдыд куыд уа.
— Сæ бæркæдтæй хъуаг куыд не ’ййафа
— Бынаты Бардуаг, дæ быны хъомыл кæндзæн, æмæ йæ дæ хорзæх уæд
— Йæ авдæнгæс фæу
— Хорзæй байрæзæд.
— Дæ бынæй-иу æдзух дæр фæндараст кæнæд.
— Æгас хæдзар-иу ссарæд
— Йæ ныййарджытæн-иу цин æмæ сæрыстырдзинад æрхæссæд.
