Гагарин Юрийæн 

Зæхх, нæ уромæг, нæ дарæг, 

Зæхх, нæ уæлион дзæиæт! 

Ды — нæ чысыл цины зарæг, 

Ды — нæ бирæ хъыг, нæ мæт. 

У дæ денджызты цæхджын дон 

Не ‘нкъард сагъæсы цæссыг, 

У дæ хъызт зымæг нæ зындон, 

Мигъ дæ цъæх арвыл — нæ хъыг. 

Арты пиллоны куы ссудзыс, 

Хæст куы сгуылф кæны дæуыл, 

Уæд нæ зæрдæ дæр рæмудзы, 

Уæд нæ зæрдæ дæр кæуы. 

Мах — фæндаггæрдæг дæ разæй. 

Æви не ‘нусон хæс нæу: 

Дард хъæддаг лæгæтты цъассæй 

Тулæм рухсæй-рухсмæ дæу? 

Мах нæ саг фыдæлты стджытæй 

Ард тъымы-тъыма хæрæм: 

Де ‘рдаг, де ‘гъуыстаг сыджытыл 

Ма уа ‘фхæрд æмæ хæрам. 

Зонæм, арæны тæлмытæ 

Раст дæ зæрдæйыл цæуынц, 

Æмæ маргæйдзаг кæлмытау 

Сонт, тæссаг хæлбурцъ кæнынц. 

Туг дыл уары, уæд фыдæх дæ, 

Уæд мæлæт дыл кæны зиу, 

Цины хъарм цæссыджы ‘ртæхтæй 

Дидин рафтауы дæ риу. 

Æмæ скъæфы мах нæ нысан, 

Æмæ у нæ цин, нæ мæт: 

Иууон цардуалдзæг — æнусон — 

Искуы ралæууид дыл кæд. 

Хи дæ уæлдæфæй куы стонæм, 

Ма зæгъ — лидзæм дæ, хæрзаг, 

Уый кæнæм дæ цыт, дæ номæн 

Арвы стъалытæм фæндаг. 

Гъемæ кæд æгадæй рафтæм, — 

Ма ратт не стджытæн ингæн; 

Кæд цытимæ дыл-иу бафтæм, 

Уæд адджын хъæбыс нын кæн.