Л... 

Ме ‘рхæндæг цырагъхуыст Нефертити, 

Ныр мæйрухсы аууонау цæуыс, 

Уазал худы де ‘рвон уындæй цъити, 

Арвыроны нал хъазы дæ хуыз... 

Хуртæ нæ, мынæг мæйтæ дæ хъуыртæй 

Ныр æнкъард, къæмдзæстыгæй кæсынц, 

Цæстытæ сæ дæргъæлвæст зыхъхъыртæй 

«Уагæры цы ракодтам?» — фæрсынц. 

Уæ, бынбауай, а дуне, бынбауай, 

Кæд дæ бон цы фидыцæй фæцух! 

Кæд дæ ирд зæххон хуртæй куы хъауай, 

Уæд уæларв дæу никуы скæна рухс!.. 

Уый кæддæр йæ сау дзыккуты хаста 

Уалдзыгон ыстъалыджын æхсæв, 

Уый æрмæст æууæндыд æмæ уарзта, 

Æмæ кодта дидинджыты тæф. 

Йе ‘нæбын рæсуг цæстыты малæй 

Цинуылæн, æлутонау, ивылд, 

Дæндæгты цырен фæрдгуыты халæй — 

Мидбылхудты удыхос тыфыл. 

Уадулты — сæуæхсиды тад цъити, 

Ирд æртахы хуры тынау рызт. 

Раст, цыма, мысыйраг Нефертити 

Рухскалгæ йæ зæппадзæй ысхызт. 

Уый уыдис æгасæй дæр цырæгътæ, 

Электроны стъæлфæнтæ дзы калд. 

Уарзты зарæг мин уадындзæй цагъта 

Æмæ худт йæ фидыц уæнгтæй цард. 

Фæлæ иухатт фескъуыди йæ худын 

Æмæ ‘рталынг алфæмблай æваст. 

Калмы ссырау аныдзæвд йæ удыл 

Ихуазал хъæстæ зæрдæйы уарзт. 

Цинуылæн мыдгъуыз цæстыты аих, 

Ахуыссыди мин цырагъы рухс. 

Дуне, дуне, уаих фæуай, уаих, 

Кæд дæ бон цы фидыцæй фæцух!.. 

Ме ‘рхæндæг фæсмонгонд Нефертити 

Не ‘хсæн ныр сæргуыбырæй цæуы. 

Æмæ йе ‘мпылд мидкъуыбыры дидин 

Рагуалдзæджы уазалыл кæуы.