Iriston.com
www.iriston.com
Цæйут æфсымæртау раттæм нæ къухтæ, абон кæрæдзимæ, Иры лæппутæ!
Iriston.com - история и культура Осетии
Кто не помнит прошлого, у того нет будущего.
Написать Админу Писать админу
 
Разделы

Хроника военных действий в Южной Осетии и аналитические материалы

Публикации по истории Осетии и осетин

Перечень осетинских фамилий, некоторые сведения о них

Перечень населенных пунктов Осетии, краткая информация о них и фамилиях, в них проживавших

Сборник материалов по традициям и обычаям осетин

Наиболее полное на сегодняшний день собрание рецептов осетинской кухни

В данном разделе размещаются книги на разные темы

Коста Хетагуров "Осетинскя лира", по книге, изданной во Владикавказе (Орджоникидзе) в 1974 году.


Перечень дружественных сайтов и сайтов, схожих по тематике.



Rambler's Top100 Рейтинг@Mail.ru Индекс цитирования
Статьи Словари
Здравствуйте, Гость
Регистрация | Вход
Опубл. 20.08.2011 | прочитано 2127 раз |  Комментарии (0)     Автор: Tabol Вернуться на начальную страницу Tabol
НÆ ТУГ, НЕ СТÆГ

Журнал «Мах дуг», 1988 аз, №7 

 

Цардтымыгъ æй фæхаста йæ райгуырæн зæххæй, цæргæ-цæрæнбонты йæм æцæгæлон бæстæйы йæ былыцъæрттæ фæхордта. Фæлæ нал сæмбæлд йæ фыды уæзæгыл Гæздæнты Гайто йæхæдæг.  

Фæлæ, нæ амондæн, абон курдиаты фæндæгтæ байгом сты, æмæ Гайто дæр фыццаг хатт уал æмæ уал азы фæстæ йæ адæмимæ ныхас кæндзæн. 

Чи уыд, уый базоныны тыххæй йын цыбырæй йæ цардвæндаг радзурæм. Гæздæнты Гайто (йæ аргъуыды ном — Георгий) райгуырдис 1903 азы Петербурджы. Ам йæ фыд Бæппи (Иван) каст фæци Хъæды хæдзарады институт. 

Гайтойы ныййарджытæ уыдысты уæды заманы ирон интеллигенцийы минæвæрттæ — сæ бинонты æхсæн кадджынæй нымадтой аивад æмæ литературæ, æвзæгтæ зонын, социалон-экономикон фарстатæм лæмбынæгæй хъус дарын. Йæ мад æмæ фыд тынг хæларæй, уарзонæй кæй цардысты, уый дæр хорзырдæм фæахъаз сабийы хъомыладæн, алцæмæдæр зæрдæргъæад цæмæй уыдаид, уымæн. Æртындæс азмæ Гайто бирæ зындгонд фысджыты уацмыстæй уæлдай бакаст ахæм философты чингуытæ: Юм, Фейербах, Спиноза, Шопенгауэр, Ницше, Ренан, Штирнер, Кропоткин... 

Петербургæй Гæздæнтæ ацыдысты Сыбырмæ, фæстæдæр цардысты Белоруссийы, Тверы губернийы, Украинæйы, Бæппи-иу йæ куысты фæдыл кæдæм афтыдис, уым. Фæлæ-иу сæ сæрд æрвыстой Ирыстоны. 

Гайтойы фыдæлтæ уыдысты Къусæгонты иу къабаз, Дзæуджыхъæумæ æрбалыгъдысты нудæсæм æнусы райдиан Урсдонæй. Ирон культурæйæн стыр хæрзты бацыдис Гæздæнты ацы хæдзарвæндаг. Цаутæй хъæздыг уыди Гайтойы фыдыфыд Сæгейы цард. Уыцы рæстæджы сæрæнгуырдыл нымад ьыди, бæхрæгъæуттæ-иу чи ратардта, уый. Сæге дæр ахæм хуызы сномдзыд. Хъæбатырæй хæцыд Турчы хæсты дæр. Фæлæ йæ цоты — дыууæ чызджы æмæ цыппар фырты — сарæзта ахуыры арфæйаг фæндагыл. Гайтойы фыдыфсымæр Данел уыд зындгонд æвдакат, ирон интеллигенцийы зынгæ минæвар, хæларæй цардис Хетæгкаты Къостаимæ, фæстæдæр та — Коцойты Арсенимæ. Куыста цензорæй ирон периодикон мыхуырæн æмæ æппæт мадзæлттæй дæр архайдта, цæмæй национ мыхуыр ссæст ма цæуа, ууыл. Данелы чызг Аврорæ та сси фыццаг ирон балеринæ. 

Гайтойы фыдыфыды æфсымæры фырт Гæздæнты Дзыбын дæр уыд ахуыргонд дохтыр, æхсæны кусæг, «Ирон газет» æмæ чиныгуадзæн æхсæнад «Ир»-ы хъазуатон уæнг. 

Ирыстоны хорз зыдтой Гæздæнты Гуыргъохъы дæр — æвдайæм азты Петербурджы кавказаг народникты къорды уæнг. Фæстæдæр Дзæуджыхъæуы ахæм къорд чи сарæзта, уыдонæй иу уыд Гуыргъохъ. Уыцы къорды хъæппæрисæй Ирыхъæуы сусæгæй арæзт æрдыд скъола мæгуыр адæмы сывæллæттæн — ахуыргæнæгæй дзы куыста Гуыргъохъы бинойнаг Мелани. Ацы хæдзарвæндаджы хæрæфырт у Къубалты Алыксандр дæр. 

Гайто та йæхæдæг куырттатаг Абациты хæрæфырт — уыдон Дзывгъисæй куы ралыгъдысты, уæд æрцардысты Хъæдгæроны. Гайтойы мад Дикæйы (йæ аргъуыды ном — Верæ) гыццыл чызгæй аластой Петербургмæ æмæ ам хъомыл кодта йæ фыдыфсымæр Абациты Мæхæмæты (Иосифы) хæдзары. Мæхæмæт рæдау фысым фæцис Къостайæн —1881 азы поэт куыддæр Петербургмæ ссыд, афтæ бацагуырдта Абациты хæдзар. Мæхæмæт æвдайæм азты ахуыр кодта Петербурджы технологон институты, йæ революцион архайды тыххæй къорд хатты ахсты бахауди. Мæхæмæты бинойнаг Погожева Лидия дæр архайдта революцион змæлды. Кæд фæстæдæр уыцы куыстæй иуварс ацыдысты, уæддæр адæмы раз сæхи хæсджын хуыдтой. Хъæдгæройнæгтæ 1905 азы революцион змæстыты кæй архайдтой, уый тыххæй æхцайæ иваргонд фесты, æмæ, æфстæуттæ райсгæйæ, Мæхæмæт хъæуы номæй бафыста 3500 сомы сызгъæринæй. Сæ хæдзар æнусы æмбис уыд фæрныг фысым, Петербурджы-иу цы ирон фæсивæд ахуыр кодтой, уыдонæн. Æмæ Абацитæ мыггагмæ арфæйаг фесты Къостайæ Абайты Васойы онг фæлтæртæн. Ацы хæдзары схъомыл сты æмæ ахуырад райстой сæ бирæ хæрæфырттæ. Гайто та гуыргæ дæр ам ракодта æмæ йыл цалынмæ æртæ азы сæххæст, уæдмæ уыдонмæ фæцис. 

1911 азы фæзиан Гайтойы фыд. Æнахъомæй амардысты йæ дыууæ хойы дæр. Афæдзы фæстæ Гайто бацыд Харьковы гимназмæ æмæ дзы фæахуыр кодта 1919 азмæ. 

Йæ ахуыры азтæ æрæййæфтой, историон цаутæ дуне иннæрдæм куы фæкодтой, уыцы рæстæджытæ: фыццаг дунеон хæст, дыууæ революцийы, мидхæст: Гайто, кæй зæгъын æй хъæуы, йæ алыварс царды цаутæм иуварсæй куыдфæндыйы цæстæй нæ касти. Тынг æй фæндыд, цы уыдта æмæ цы хъуыста, уыдоны сæйрагдæр мидис бамбарын. Æмæ йæ йæ цымыдисаг хъуыдытæ, йæ тæссонд фæндтæ ныдздзæгъæлтæ кодтой, тæссармæ фæндагыл æй сæ фæдыл асайдтой. Йæ фыццаг радзырдты, уыцы рæстæгыл ныхас кæм цæуы, уыдоны æвдисы наркомантæ æмæ хæлд сылгоймæгты, анархисттæ æмæ фыдгæнджыты — йæхæдæг цыбыр рæстæг ахæмты æхсæн арвыста. 

Нудæсæм азы сæрды, авд къласы куыддæр фæцис, афтæ Гайто фидарæй скарста: йæ ахуыр ныууадздзæн æмæ хæстмæ ацæудзæн. Цыдис ыл æхсæрдæсæм аз. Дзæуджыхъæуы йæ хæстæджыты федта, стæй Кисловодскмæ йæ фыдыфсымæрмæ ацыд. Гайтойæ уыцы кары цæй политик уыд! Мæнæ куыд фыссы йæ автобиографион роман «Изæр Клэримæ»-йы: «Бархионтæ хæрд фæуыдзысты æви хæст рамбулдзысты, уый мæн никæцырдыгæй æндæвта. Мæн æрмæстдæр иу хъуыддаг фæндыд базонын: хæст циу, уый. Æз тырныдтон, цы нæ зыдтон, уыдæттæ фенынмæ. Урс æфсадмæ уый тыххæй бацыдтæн æмæ уыцы рæстæг, уыдон цы зæххытæ бацахстой, æз дæр уым уыдтæн, иннæмæй та — бирæты фæзмыдтон; фæлæ, зæгъæм, Кисловодск сырхыты къухы куы уыдаид, уæд æз дæр, æвæццæгæн, сырхыты æфсадмæ бацыдаин». 

Гайто Кисловодскæй Харьковмæ аздæхт йæ мадæн хæрзбон зæгъынмæ. «Мæ фæнд æй зæрдæдзæф фæкодта. Æрхатыд мæм, лæгъстæ мын кодта, цæмæй ма ацæуон, уый тыххæй, фæлæ ме ’хсæрдæс азы кар тæригъæд нæма зыдта, æндæр куыд хъуамæ фæраст уыдаин хæцынмæ, дæ мады иунæгæй ныууадз, афтæмæй — мацы дæ уырнæд, мацæмæй дæ зæрдæ райæд, æрмæст, хæсты ногæй цыдæртæ кæй фендзынæ æмæ бамбардзынæ, æмæ дæ уыдон, чи зоны, кæд иннæрдæм фæкæниккой, зæгъгæ, уый охыл». 

Службæ кодта бронепоезды. Йе ’нахъом уд сфæлтæрдта хæсты бæллæхты, федта туг æмæ мæлæт, хъæбатырдзинад æмæ тæппуддзинад — царды уæлвонг цин фæсыкк йæ зæрдæйы. 

Ссæдзæм азы ноябры мæйы, Врангелы дæрæн æфсæдтæй ма цы баззад, уыдон — зæгъæн ис, тыхæй — ласт цыдысты Туркмæ. Семæ Гайто дæр бафтыд Галипполийы æфсæддон лагерьмæ æмæ дзы афæдзы бæрц æрдаудта. Хицауад сæхи афтæ æвдыстой, цыма Турчы цы ныфссаст æмæ æнæхæдзар салдæттæ ис, уыдон æфсад сты — афицертæ домдтой, цæмæй сын æфсæддон кад дæттой, цæмæй тæлфын дæр ма уæндой, уый. Гайто, æнæрцæф лæппу, уæззау уавæры бахауд. Уый йæхи дæлбар нæ уагъта, уыдон та дзы коммæгæс фæсдзæуин уæвын агуырдтой. Æмæ йæм смæсты сты, æмæ карз æфхæрд баййæфтаид, фæлæ йæ сæрыл, йæ фыды йын хорз чи зыдта, ахæм афицер рахæцыд, стæй йын алидзынæн дæр баххуыс кодта. Афтæмæй Гайто Стамбулмæ бафтыд æмæ ам æнæнхъæлæджы фембæлди Гæздæнты Аврорæйыл — уый уæдмæ балеринæ сси, революцийы агъоммæ ацыд Уæрæсейæ фæсарæнтæм. Аврорæ æмæ йæ лæг (уый дæр кафæг уыд) бацархайдтой, цæмæй Гайтойы уырыссаг гимназмæ ахуыр кæнынмæ райсой. Уыцы гимназ байгом дыууын дыккæгæм азы апрелы мæйы Болгарийы Шумены горæты. Афæдзы фæстæ, аттестат куы райста, уæд Гайто фæраст Парижмæ. 

Дунейы рæсугъддæр горæт чъылдымздæхт уыд йæ хæддзу уазджытæм. Æмæ цы нæ бавзæрста ам Гайто дæр! Уæхскуæзæй алы уæргътæ хаста наулæууæны, стæй паровозтæ æхсадта, автомобильтæгæнæн заводы уыд быраузилæг, францусæгты ахуыр кодта уырыссаг æвзагыл, уырыссæгты та францусагау, стæй уынджы къæйыл аззад æмæ ссис клошар — гæвзыкк æмæ æнæхæдзар. Уынджы, кæнæ-иу метройы станцæты бахсæвиуат кодта. Йæ сæрыстырдзинад æй хызта мамæлайы къæбæр курынæй, мæгуыр уæвынæй æмæ афтæ тыхамæлттæй иу зымæг арвыста, цалынмæ æхсæвкусæг таксийы шофыр не ссис, уæдмæ. Бирæ азты фæкуыста таксистæй, бындуронæй базонгæ Парижы æхсæвыгон цардимæ, амондæй хъодыгонд мæгуырты хъысмæтимæ — буржуазон æхсæнады фæскъуымтимæ. 

Куыддæр ын гæнæн фæцис, афтæ та ахуырмæ бавнæлдта — бацыдис Сорбоннæйы университетмæ æмæ дзы цыппар азы историон-филологон факультеты фæахуыр кодта литературæйы истори, социологи æмæ экономикæ. 

Гайто фыссын райдыдта, Стамбулы ма куы уыд, уæд. Йæ уацмыстæ мыхуыры цыдысты журналты, литературон изæрты-иу каст йæ радзырдтæ æмæ эссетæ. 1930 азы Парижы рацыд Гайтойы фыццаг чиныг — роман «Изæр Клэримæ». Æмæ йын æмбойны ном скодта фæсарæйнаг уырыссаг литературæйы: Бунины зæрдæмæ дæр фæцыд, уый уæлдай тынгдæр æппæлыд æрыгон фыссæджы стилистон дæсниадæй. 

Эмигранттæ сызнæт сты Горькимæ, уый советон хицаудзинады фарс Кæй ныллæууыд, уый тыххæй æмæ йыл бахъоды кодтой. Гæздæны-фырт уый сæрты ахызт: йæ роман Горькийæн Соррентомæ арвыста. Уайтагъддæр дзы арфæйы фыстæг райста: «Зæрдæбынæй Дын арфæ кæнын дæ лæвары фæдыл, Дæ чиныг мын кæй æрбарвыстай, уый тыххæй. Тынг æхсызгонæй иæ бакастæн, зæгъæн ис — адджынæн, уый та арæх нæ вæййы, кæд гыццыл нæ кæсын, уæддæр. Ды йæ, кæй зæгъын æй хъæуы, Дæхæдæг дæр æнкъарыс, курдиатæй хъулон хайджын кæй дæ, уый — æз ма йæм афтæ дæр бафтауин, æмæ хæдбындур курдиатæй...» Гайто Горькийæн дзуапп радта æмæ йæм фыссы: «Стыр бузныг Дæ дæн, Уæрæсемæ дын дæ чиныг арвитæм, зæгъгæ, мæ бар кæй курыс, уый тыххæй. Æз тынг амондджын уаин, мæ чиныг уым куы рацæуид, уæд, уымæн æмæ ам махæн чиныгкæсджытæ нæй, стæй дзы уæвгæ махæн ницы ис. Иннæрдыгæй та, Дæхæдæг, æвæццæгæн, бамбæрстаис мæ чиныгæй, æз „эмигрантон автортæм“ кæй нæ хауын, уый — æз фаг нæ зонын Уæрæсе, уымæн æмæ уырдыгæй ацыдтæн, æхсæрдæс азæй мыл чысыл фылдæр куы цыд, уæд; фæлæ Уæрæсе мæ райгуырæн бæстæ у, æмæ уырыссаг æвзагæй уæлдай æндæр ницавæр æвзагыл у мæ бон фыссын æмæ фысгæ дæр нæ кæндзынæн». 

Æртынæм азты Гайто архайдта, цæмæй йæ райгуырæн бæстæмæ æрбаздæха, ууыл. 1935 азы 20 июлы уый фыста Горькимæ: «Мæн фæнды Советон Цæдисмæ аздæхын æмæ, Ды мын уыцы хъуыддаджы æххуысгæнæг куы фæуис, уæд æз минæварадмæ курдиат бадæттин æмæ мæм фынддæс азы дæргъы фыццаг хатт бахъарид, мæ цардæн дæр æмæ мæ литературон куыстæн дæр нысан кæй ис, уый, ам та Европæйы сæ дыууæ дæр нæ хъæуынц æмæ æнæпайда сты». Æрмæстдæр йæ саукъухфыст баззад, Горький Гайтойы курдиатæн цы дзуапп æрвитинаг уыд, уымæн: «Мæ зæрдæйæн хæстæг у, Дæу дæ райгуырæн бæстæмæ æрбаздæхын кæй фæнды, уый æмæ мæ бон цы уа, уымæй Дын цæттæ дæн баххуыс кæнынмæ. Ды курдиатджын адæймаг дæ æмæ ам зæрдæзæгъгæ куыст ссардзынæ, царды цин та ис æрмæстдæр уый мидæг. Салам. М. Горький». 

Бæрæг нæу; Горькийæн хъуыддагæй исты йæ къухы бафтыд, уый: 1936 азы амардис. Гайто курдиат ныффыста советон минæварадмæ, фæлæ йын æрбаздæхыны бар лæвæрд не ’рцыд. 

Гайтойы мад, граждайнаг хæст куы банцад, уæд Дзæуджыхъæумæ ссыд. Ам пединституты куыста францусаг æмæ немыцаг æвзаджы ахуыргæнæгæй. Йæ фырт æй бæргæ бирæ уарзта, фыста йæм, æрвыста йæм йæ уацмыстæ, йæ фыццаг роман дæр ын бакаст, фæлæ кæрæдзийы нал федтой: Абацион 1939 азы ахицæн. 

Уымæй æртæ азы размæ Гайто бинонты хъуыддаг бакодта, ракуырдта Ламзаки Фаинæйы — Одессæйæ рафтгæ бердзенæгты чызджы. Дыккаг дунеон хæст куы райдыдта, уæд Гæздæны-фырт, Францæн йæ иузæрдион фарсхæцæг кæй уыдзæн, уый тыххæй йæ къух декларацийы бафыста. Немыц Париж куы бацахстой, уæд Гæздæнтæ никæдæм алыгъдысты. Гайто таксийæ нал куыста — кæй ма хъуыд такси, æмæ цæрыны амæлттæ кодтой уырыссаг æмæ англисаг æвзаджы уроктæй. Се ’мбæлттæй сусæгæй немыцы ныхмæ чи хæцыд, уыдонæй цалдæры бамбæхстой, стæй сæ Парижæй фæсвæд ранмæ арвитынмæ фæкастысты. Уæдмæ сæхæдæг дæр 1942 азы Ныхкъуырды архайды уæнгтæ систы, фашизмы ныхмæ тох кодтой, Францы цы советон партизанты къорд уыд, уый рæнхъыты. 

Гайто информацион бюллетены редактор уыд, Файнæ та партизанты къордты æхсаён бастдзинад дардта. Советон партизантæ Францы куыд хæцыдысты, уый тыххæй Гайто чиныг ныффыста æмæ францусаг æвзагыл 1946 азы рацыд. Уырыссагау къухфыстæй баззад. Чиныг хуыйны «Францы зæххыл». 

Кæд Гæздæны-фырт сусæгæй архайæг коммунистты рæнхъыты уыд, уæддæр афтæ зæгъæн нæй, æмæ йæхæдæг дæр коммунист у. Сыгъдæгзæрдæ адæймаг уæвгæйæ, уый йæхицæн хæсыл нымадта фашисттимæ тох кæнын уыд йæ бæстæйы иузæрдион патриот æмæ йæ дзырдæн фидар хицау. Йæ райгуырæн бæстæ уарзта, никуы йыл сивта йæ зæрдæ, кæд нæ политикон институттæм критикон цæст дардта, уæддæр. Эмигранттæй цъаммар антисоветон чи уыд, уыдонæй йæхи дард ласта. Уырыссаг фысджыты æмæ журналистты Цæдисæй рацыд, уый уагæвæрды ахæм сæрмагонд домæн куы фæзынд, советон паспорт чи райса, кæнæ та советон бæстæйы фарс чи лæууа, уыдонæн Цæдисы уæнг уæвæн нæй, зæгъгæ, уæд. 

Ногæй та таксийыл куыста æмæ йæ ныууагъта æрмæстдæр 50-æм азты, йæ романтæ æмæ йæ чиныг «Францы зæххыл» куы рацыдысты, йæ ном куы айхъуыст, æндæр европæйаг æвзæгтæм дæр сæ куы ратæлмац кодтой, уæд — амал сын фæцис айдагъ литературон куыстæй рæстæмбис цæрынæн. Йæ ном та æцæг нымады ссис, хуыздæр фæсарæйнаг уырыссаг фысджыты æмрæнхъ æрлæууыд, стыр аргъ ын скодтой критикæйы Г. Адамович, М. Осоргин, М. Слоним, В. Вейдле, В. Ходасевич, В. Набоков, Г. Струве, З. Гиппиус, Н. Берберова... 

Ласло Динеш стыр иртасæн куыст ныффыста Гæздæнты Гайтойы цард æмæ сфæлдыстады тыххæй дзы афтæ зæгъы, уый æмæ Набоковы стилистон æнтыстытæн, дам, стыр ахадындзинад ис уырыссаг прозæйы фидæны сырæзтæн. 

Гайтойы сфæлдыстады сæйраг бынат ахсы адæймаджы миддуне, йæ удтухитæ, йæ зæрдæйы ахаст, йæ сагъæстæ æмæ катайтæ. О, ууыл фыста Гайто. Фæлæ фыста, куыд йæ райгуырæн бæстæйы рыст хъæбул, йæ райгуырæн бæстæйы сæрыстыр фырт, йæ адæмы курдиат, æхсар æмæ лæгдзинадæй хайджын гуырд. Йе стæг, йе ’мтуг адæмыл гадзрахатæй нæ рацыд, йæ курдиат æмæ йæ лæджы ном цыфæнды зын уавæрты дæр уæййаг не скодта. 

Ахадгæ сфæлдыстадон бынтæ ныууагъта Гæздæнты Гайто: дæс романы, дзæвгар радзырдтæ, уацтæ æмæ эссетæ. «Изæр Клэримæ»-йы фæстæ фæзындысты йæ романтæ «Иу балцы хабар» (рацыд 1938 азы); «Тахт» (1939); «Александр Вольфы æндæрг» (1947–48); «Буддæйы раздæхт» (1949–50) «Æхсæвыгон фæндæгтæ» (1952); «Пилигримтæ» (1953–54); «Райхъал» (1965–66); «Эвелинæ æмæ йæ хæлæрттæ» (1969–1971) æмæ йæ фæстаг роман, æххæст кæй нæ фæци фыст, уый — «Фæфæлдæхт»,— мыхуыры фæзынд 1972 азы. 

Гайто амардис 1971 азы 5 декабры. Бавæрдтой йæ Парижы уырыссаг уæлмæрд Сен-Женевьев-де-Буайы. 

Гæздæны-фырты сфæлдыстады хицæн миниуджытæй иу у, йæхи цардвæндаджы хабæрттæ дзы бирæ кæй ис, уый. Ахæм у йæ радзырд «Сакъадахыл» дæр — фæсномыгæй дзы æвдыст цæуы, Болгарийы Шумены гимназы куы ахуыр кодта, уыцы рæстæг. Æхсызгонæй йæ мысыд кæддæриддæр Гайто, йæ романтæй ма цалдæры йæ кой кæны. Сæ гимназ æцæгæлон бæстæйы сакъадахау уыди, Райгуырæн зæххы дымгæхаст гæппæл, царды фурды чи фæдзæгъæл, ахæм нау. Цы бæлццæтты ласы, уыдон сæ хуыздæр, сæ ахсджиагдæр бæллицтæй фыдæнхъæл фæуыдзысты,— ахæм хъуыдытыл æфтауы радзырд «Сакъадахыл». Уацмыс фыццаг хатт мыхуыр уыди 1932 азы 3 апрелы парижаг газет «Последние новости»-йы. 

 

 

Бзарты Руслан 



<==    Комментарии (0)      Версия для печати
Реклама:

Ossetoans.com allingvo.ru OsGenocid OsGenocid ALANNEWS jaszokegyesulete.hu mahdug.ru iudzinad.ru

Архив публикаций
  Июля 2019
» Открытое обращение представителей осетинских религиозных организаций
  Августа 2017
» Обращение по установке памятника Пипо Гурциеву.
  Июня 2017
» Межконфессиональный диалог в РСО-Алании состояние проблемы
  Мая 2017
» Рекомендации 2-го круглого стола на тему «Традиционные осетинские религиозные верования и убеждения: состояние, проблемы и перспективы»
» Пути формирования информационной среды в сфере осетинской традиционной религии
» Проблемы организации научной разработки отдельных насущных вопросов традиционных верований осетин
  Мая 2016
» ПРОИСХОЖДЕНИЕ РУССКОГО ГОСУДАРСТВА
» НАРОДНАЯ РЕЛИГИЯ ОСЕТИН
» ОСЕТИНЫ
  Мая 2015
» Обращение к Главе муниципального образования и руководителям фракций
» Чындзӕхсӕвы ӕгъдӕуттӕ
» Во имя мира!
» Танец... на грани кровопролития
» Почти 5000 граммов свинца на один гектар земли!!!
  Марта 2015
» Патриоту Алании
  Мая 2014
» Что мы едим, или «пищевой терроризм»
  Апреля 2014
» ЭКОЛОГИ БЬЮТ ТРЕВОГУ
  Августа 2013
» Хетӕг Ирыстонмӕ цӕмӕн лыгъд?
» Кто такие нарты?
» Ды хъæздыгдæр уыдтæ цардæй
» ДЫУУӔ ИРӔН ЙӔ ЗӔРДӔ ИУ УЫД
» ПОМНИТЕ, КАКИМ ОН ПАРНЕМ БЫЛ...
» ТАБОЛТЫ СОЛТАНБЕДЖЫ 3АРӔГ
  Июля 2013
» «ТАМ ПОЙМЕШЬ, КТО ТАКОЙ»…
» Последнее интервью Сергея Таболова