Хæфс æмæ мыст схыл сты. Рацыдысты хус къуыбырмæ æмæ уым кæрæдзийы нæмын райдыдтой. Хъæрццыгъа кæсы æмæ уыны, хылгæнджытæй рохуаты кæй баззад, уый. Йæхи сыл раскъæрдта æмæ сæ дыууæйы дæр аскъæфта. 

Иу куырм лæг йæ хæдзармæ фæцæйцыди. Æхсæв уыд мæйдар. Куырм лæг цыди йæ размæ цырагъ даргæйæ. 

— Ныр кæд æдылы нæу, уæд æй, цымæ, куырм уæвгæйæ цырагъ цæмæн хъæуы? — загъта чидæр. 

— Цæмæй йыл цæстджынтæ сæхи ма скъуырой, уый тыххæй. 

Зæронд баба сагъта фæткъуы бæлæстæ. 

— Цæмæн ма дæ хъæуынц уыцы бæлæстæ, цы ма сæ фендзынæ, сæ дыргътæй ма сын фæхъæстæ уыдзынæ? — дзурынц æм алырдыгæй. 

— Æз сæ куынæуал фæхъæстæ уон, уæддæр сæ хæрæг уыдзæн, æмæ мын бузныг зæгъдзысты, — загъта сын зæронд баба.