Иу паддзах цуаны уыд, афтæмæй тæрхъусы фæдыл йæ уарзон уарийы ауагъта æмæ бæх æрхоста.
Уари тæрхъусы æрцахста. Паддзах тæрхъусы уарийæ байста æмæ дон агурын байдыдта, дойны йын уыди. Иу къуыбырыл ссардта дон. Паддзах саргъы дзыппæй къус систа æмæ йæ донмæ бадардта. Дон æртахгай тагъди. Къус куы байдзаг и, уæд æй паддзах йæ дзыхмæ схаста, аназон æй, зæгъгæ. Фæлæ æвиппайды уари паддзахы уæхскæй фесхъиудта, йæ базыртæ сцагъта æмæ къусы дон акалдта. Паддзах та йæ къус донмæ бадардта. Бирæ фенхъæлмæ касти, цалынмæ байдзаг и, уæдмæ. Фæлæ та йæ йæ дзыхмæ куыд схаста, афтæ та уари йæ базыртæ бацагъта æмæ дон акалдта.
Æртыккаг хатт дæр та паддзах къус байдзаг кодта æмæ йæ нуазынмæ куыд хъавыд, афтæ йын æй уари акалдта.
Уæд паддзах смæсты ис æмæ уарийы йæ тых-йæ бонæй зæххыл ныццавта. Уари фæмард ис.
Уæдмæ æрбахæццæ сты паддзахы фæсдзæуинтæ дæр, æмæ дзы иу къуыбырмæ, доны гуырæнмæ, азгъордта, кæд уым къус тагъддæр байдзаг уаид, зæгъгæ. Фæлæ фæсдзæуин дон не ’рхаста. Фæстæмæ афтидæй æрыздæхт æмæ загъта:
— Уыцы донæй нуазæн нæй: суадоны хуылфы калм ныббадти æмæ дзы йæ марг ауагъта. Хорз æмæ-иу уари дон акалдта, куы дзы банызтаис, уæд амардаис.
— Хорз нæ бакодтон уæдæ мæ уарийæн. Уый мæ мæлæтæй фервæзын кодта, æз та йæ маргæ акодтон, — загъта ма паддзах.
